Shraddha Kapoor: बॉलिवूड अभिनेत्री श्रद्धा कपूरच्या चाहत्यांसाठी आनंदाची बातमी समोर आली आहे. ‘स्त्री २’ या सुपरहिट चित्रपटानंतर तिच्या पुढील चित्रपटाची सर्वांनाच उत्सुकता होती. अखेर श्रद्धाच्या नव्या ‘ईथा’ या चित्रपटाच्या प्रदर्शनाची अधिकृत घोषणा करण्यात आली आहे. या चित्रपटाची कथा, कलाकार आणि प्रदर्शनाची तारीख याबाबतची माहितीही समोर आली आहे.

निर्मात्यांनी दिलेल्या माहितीनुसार, ‘ईथा’ हा चित्रपट २८ ऑगस्ट २०२६ रोजी देशभरातील चित्रपटगृहांमध्ये प्रदर्शित होणार आहे. विशेष म्हणजे हा दिवस रक्षाबंधनाच्या सणाचा असल्याने चित्रपटाला सुट्टीचा फायदा मिळण्याची शक्यता आहे. त्यामुळे प्रेक्षकांमध्ये या चित्रपटाबद्दल आतापासूनच उत्सुकता निर्माण झाली आहे.

 

View this post on Instagram

 

A post shared by Taran Adarsh (@taranadarsh)

‘ईथा’ या चित्रपटाची निर्मिती प्रसिद्ध निर्माता दिनेश विजन यांनी केली असून दिग्दर्शनाची धुरा लक्ष्मण उतेकर यांनी सांभाळली आहे. यापूर्वी ‘छावा’ या यशस्वी चित्रपटासाठी या दोघांनी एकत्र काम केले होते. आता पुन्हा एकदा ही जोडी एका वेगळ्या आणि महत्त्वाच्या विषयावर आधारित चित्रपट घेऊन प्रेक्षकांसमोर येत आहे.

या चित्रपटात श्रद्धा कपूर मुख्य भूमिकेत झळकणार आहे. तिच्यासोबत अभिनेता रणदीप हुडा आणि मोहम्मद जीशान अय्यूब यांच्याही महत्त्वाच्या भूमिका आहेत. या तिन्ही कलाकारांच्या अभिनयाची प्रेक्षकांना मोठी उत्सुकता आहे.

‘ईथा’ हा चित्रपट महाराष्ट्रातील प्रसिद्ध लावणी आणि तमाशा कलाकार विठाबाई भाऊ नारायणगावकर यांच्या जीवनावर आधारित बायोपिक आहे. विठाबाई यांनी आपल्या कलेच्या जोरावर तमाशा आणि लावणीला एक वेगळी ओळख मिळवून दिली होती. त्यांच्या आयुष्यातील संघर्ष, कलेप्रती असलेली निष्ठा आणि यशाचा प्रवास या चित्रपटातून दाखवला जाणार आहे.

shraddha kapoor

चित्रपटात १९४० ते १९९० या कालखंडातील विठाबाई यांच्या आयुष्यातील अनेक महत्त्वाच्या घटनांचा समावेश करण्यात आला आहे. एका सामान्य कुटुंबातून आलेल्या कलाकाराने आपल्या कलेच्या बळावर मिळवलेले यश, त्यासाठी केलेले कष्ट आणि समाजातील विविध आव्हानांचा सामना कसा केला, याचे चित्रण या चित्रपटात पाहायला मिळणार आहे.

दरम्यान, श्रद्धा कपूरचा मागील ‘स्त्री २’ हा चित्रपट बॉक्स ऑफिसवर प्रचंड यशस्वी ठरला होता. राजकुमार राव, पंकज त्रिपाठी आणि अभिषेक बॅनर्जी यांच्या प्रमुख भूमिका असलेल्या या चित्रपटाने विक्रमी कमाई केली होती. प्रेक्षकांनीही या चित्रपटाला भरभरून प्रतिसाद दिला होता. त्यामुळे आता श्रद्धाच्या ‘ईथा’ या चित्रपटाकडूनही मोठ्या अपेक्षा व्यक्त केल्या जात आहेत.

एकीकडे बायोपिकचा प्रभावी विषय, तर दुसरीकडे श्रद्धा कपूरसारखी लोकप्रिय अभिनेत्री आणि अनुभवी कलाकारांची साथ यामुळे ‘ईथा’ हा चित्रपट २०२६ मधील चर्चेतील चित्रपटांपैकी एक ठरण्याची शक्यता आहे. रक्षाबंधनाच्या मुहूर्तावर प्रदर्शित होणारा हा चित्रपट प्रेक्षकांच्या मनात किती स्थान मिळवतो, हे पाहणे उत्सुकतेचे ठरणार आहे.