बुलढाणा : डिसेंबर महिन्यात येथे एका विचित्र आजारामुळे अचानक लोकांचे केस गळू लागले. या प्रकरणातील वैद्यकीय अहवाल मंगळवारी समोर आला. अहवालानुसार, येथील लोकांनी त्यांच्या जेवणात ज्या गव्हाचा वापर केला, त्यामुळे त्यांचे केस गळू लागले. अहवालानुसार, या गव्हामध्ये उच्च सेलेनियम आढळले आहे. सेलेनियम हे माती, पाणी आणि काही पदार्थांमध्ये आढळणारे एक खनिज आहे. मानवी शरीराला सेलेनियमची आवश्यकता खूप कमी प्रमाणात असते आणि ते अन्नाच्या पचनामध्ये महत्त्वाची भूमिका बजावते.

हा गहू पंजाब आणि हरियाणा येथून येतो, जो महाराष्ट्रातील रेशन दुकानांमध्ये वितरित केला जातो. डिसेंबर २०२४ ते जानेवारी २०२५ दरम्यान, बुलढाण्यातील १८ गावांमध्ये २७९ लोकांमध्ये अचानक केस गळणे किंवा तीव्र अलोपेशिया टोटालिसची प्रकरणे नोंदवली गेली. सर्व वयोगटातील लोकांना अलोपेशियाचा त्रास झाला. आजारामुळे लोकांचे लग्न तुटू लागले. अनेकांनी तर मुंडनही केले होते.

तरुणींना या आजाराचा सर्वाधिक त्रास
रायगड येथील बावस्कर हॉस्पिटल अँड रिसर्च सेंटरचे व्यवस्थापकीय संचालक डॉ. हिम्मतराव बावस्कर म्हणाले की, आम्ही बाधित भागातून नमुने गोळा केले आहेत. या आजारामुळे डोकेदुखी, ताप, डोक्याला खाज सुटणे, मुंग्या येणे आणि काही प्रकरणांमध्ये उलट्या आणि जुलाब अशी लक्षणे दिसून आली. याचा सर्वाधिक फटका महिलांना बसतो. महाराष्ट्रातील ज्या भागात हा रोग पसरतो तो भाग खारट, क्षारीय माती आणि वारंवार येणाऱ्या दुष्काळासाठी ओळखला जातो. शेतीवर परिणाम झाला आहे. अनेक कुटुंबे रेशन दुकानांमधून मिळणाऱ्या सरकारी अनुदानित गव्हावर अवलंबून असतात, जो खूपच निकृष्ट दर्जाचा असतो, असेही ते म्हणाले.