अकाबा (जॉर्डन) : सीरियात बंडखोरी करून सत्तापालट घडवणाऱ्या हयात तहरिर-अल-शाम या बंडखोरांच्या संघटनेशी थेट संपर्क साधण्यात आला असल्याचे अमेरिकेचे परराष्ट्र मंत्री ऍन्टनी ब्लिंकेन यांनी म्हटले आहे. सीरियात नव्याने स्थापन करण्यात येणाऱ्या शासनाबाबत बंडखोरांचा नेता अहमद-अल-शारा याच्याशी चर्चा करण्यात आल्याचेही त्यांनी सांगितले.

हयात तहरिर-अल-शाम संघटनेला अमेरिकेने २०१८ मध्ये दहशतवादी संघटना म्हणून घोषित केले आहे. या संघटनेने अलिकडेच सशस्त्र उठाव करून बशर अल असद यांचे सरकार उलथवून लावले आणि हंगामी सरकार स्थापन केले आहे. सीरियातील सत्तेचे हस्तांतरण शांततेने व्हावे आणि तेथील अल्पसंख्यांकांच्या हक्कांचे रक्षण व्हावे, या अपेक्षेने हयातच्या नेत्यांशी थेट संपर्क साधण्यात आल्याचे ब्लिंकेन यांनी पत्रकारांना सांगितले.

मात्र हयातच्या नेत्यांशी झालेल्या चर्चेचा अन्य तपशील ब्लिंकेन यांनी माध्यमांना सांगितला नाही. सीरियातल्या नागरिकांनी विजयी व्हावे, अशी आमची अपेक्षा आहे. या कामात त्यांना मदत करण्याचेच आमचे प्रयत्न आहेत, असेही ब्लिंकेन म्हणाले. हयात तहरिर-अल-शाम संघटना पुर्वी अल कायदाशी संबंधित होती. अमेरिकेचे निर्बंध असल्यामुळे या संघटनेला अमेरिकेकडून थेट मदत केली जाऊ शकणार नाही.

तरी या संघटनेच्या नेत्यांशी थेट संपर्क साधण्यास अमेरिकेच्या नेत्यांना कोणताही अटकाव नाही. हयातचा नेता अहमद-अल-शारा उर्फ अबू मोहम्मद अल-गोलानी याने मात्र एका मुलाखतीत अमेरिकेबरोबरच्या थेट संपर्काच्या वृत्ताला दुजोरा दिला नाही. मात्र सीरियातील नवीन शासन पाश्‍चात्य देसांच्या दूतावासांच्या संपर्कात असल्याचे त्याने मान्य केले. असद यांच्या पाडावानंतर सीरियातल्या तुरुंगातून अमेरिकेच्या कैद्यांची सुटका झाल्याबद्दल अमेरिकेने समाधान व्यक्त केले आहे.