मंगळवारी २४ फेब्रुवारी रोजी तिला रुग्णालयात दाखल करण्यात आले. डॉक्टरांनी लेझर प्रक्रियेच्या माध्यमातून सिस्ट काढून टाकला. शस्त्रक्रिया यशस्वी झाली असल्याची माहिती तिचे पती आणि अभिनेता शोएब इब्राहिम यांनी सोशल मीडियावरून दिली होती. त्यांनी चाहत्यांना दीपिकासाठी प्रार्थना करण्याचे आवाहनही केले होते.

शस्त्रक्रियेनंतर दीपिकाने तिच्या ‘दीपिका की दुनिया’ या व्लॉगमधून स्वतःच्या प्रकृतीबाबत माहिती दिली. ती म्हणाली, “या वेळी मी रुग्णालयात जाताना खूप घाबरले होते. पोटदुखीही खूप जास्त होती. पण डॉक्टरांनी मला खूप धीर दिला आणि सतत पाठिंबा दिला.” शस्त्रक्रियेनंतर शुद्धीवर आल्यानंतर जवळपास अर्धा तास तिला असह्य वेदना झाल्या, असेही तिने सांगितले. मात्र आता वेदना बऱ्याच प्रमाणात कमी झाल्या आहेत आणि ती हळूहळू बरी होत आहे.

Dipika Kakar

दीपिकाने पुढे सांगितले की, “तुम्हा सगळ्यांनी केलेल्या प्रार्थनांमुळे मला खूप बळ मिळाले. तुमच्या प्रेमासाठी आणि शुभेच्छांसाठी मनापासून धन्यवाद.” तिच्या या भावनिक संदेशामुळे चाहतेही भावूक झाले आहेत. सोशल मीडियावर ती लवकर पूर्ण बरी होण्यासाठी शुभेच्छांचा वर्षाव होत आहे.

लिव्हर कॅन्सरवर मात केल्यानंतर पुन्हा एकदा आरोग्याशी संबंधित अडचण आल्याने तिच्यासाठी हा काळ आव्हानात्मक ठरला. तरीही ती सकारात्मक राहून या परिस्थितीला सामोरी गेली. तिच्या धैर्याचे आणि जिद्दीचे कौतुक होत आहे.

सध्या दीपिका घरी विश्रांती घेत असून डॉक्टरांच्या सल्ल्यानुसार पुढील उपचार आणि काळजी सुरू आहे. कुटुंबीय आणि पती शोएब इब्राहिम तिची पूर्ण काळजी घेत आहेत. चाहत्यांच्या प्रार्थना आणि कुटुंबाच्या आधारामुळे ती लवकरच पूर्णपणे ठणठणीत होईल, अशी आशा व्यक्त केली जात आहे.

Dipika Kakar: शस्त्रक्रियेनंतर घरी परतली दीपिका कक्कड; म्हणाली चाहत्यांच्या प्रार्थनांमुळे मिळाली नवजीवनाची ताकद