Dimagi Naxal Party :  पंतप्रधान नरेंद्र मोदी यांनी १५ ऑगस्टला लाल किल्ल्यावरून केलेल्या भाषणात ‘दिमागी नक्सल’ म्हणजेच ‘Intellectual Naxal’ असा उल्लेख केल्यानंतर सोशल मीडियावर त्याची जोरदार चर्चा सुरू झाली आहे.

याच पार्श्वभूमीवर ‘दिमागी नक्सल पार्टी’ नावाचे एक नवे सोशल मीडिया पेज चर्चेत आले आहे. या पेजला अल्पावधीत लाखो फॉलोअर्स मिळाल्याचा दावा केला जात आहे.

इन्स्टाग्रामवर ‘Dimagi Naxal Party’ (@dimaginaxalparty) नावाने सुरू झालेल्या या पेजने २४ तासांत एक लाखांहून अधिक, तर दोन दिवसांत १.८ लाखांहून अधिक फॉलोअर्स मिळवल्याचे सांगितले जात आहे. मात्र, ही अधिकृत किंवा मान्यताप्राप्त राजकीय पार्टी नसून पंतप्रधान मोदींच्या वक्तव्यानंतर सुरू झालेली सोशल मीडिया चळवळ आहे.

या पक्षाचे X वरील ‘दिमागी नक्सल जनता पार्टी’ नावाचे अकाउंटही आहे. त्याला सात हजारांहून अधिक फॉलोअर्स आहेत. दोन्ही सोशल मीडिया अकाउंटच्या बायोनुसार, पक्षाचा संदेश ‘विचार करा. संशोधन करा. विरोध करा.’ असा आहे. इन्स्टाग्राम बायोमध्ये संस्थापकाला ‘एक दिमागी भारतीय’ आणि सहसंस्थापकाला ‘५६ इंच वाले’ असे संबोधण्यात आले आहे.

भगतसिंगांच्या विचारधारेचा दावा –

इन्स्टाग्रामवरील पोस्टनुसार, या पेजने स्वतःला स्वातंत्र्यसैनिक भगतसिंग यांच्या विचारधारेचा अनुयायी असल्याचे म्हटले आहे. अकाउंट बंद करण्याचा किंवा देशविरोधी ठरवण्याचा प्रयत्न झाला, तर तो भगतसिंगांचा अपमान ठरेल, असा दावाही एका पोस्टमधून करण्यात आला आहे.

मात्र, हे अकाउंट नेमके कोणी तयार केले, याची अधिकृत माहिती उपलब्ध नाही. X वरील अकाउंट ऑगस्ट २०२६ मध्ये तयार करण्यात आल्याचे नमूद केले जात आहे.

अनेक प्रसिद्ध व्यक्तींना फॉलो –

या डिजिटल पेजकडून कुणाल कामरा, श्याम रंगीला, ध्रुव राठी, प्रकाश राज, अनुराग कश्यप, सोनाक्षी सिन्हा, सोनम वांगचुक आणि रवीश कुमार यांसारख्या चर्चेत असलेल्या व्यक्तींना फॉलो केले जात आहे.

या प्रकाराची तुलना अलीकडे चर्चेत आलेल्या ‘कॉकरोच जनता पार्टी’शीही केली जात आहे. ‘CJP’ ही कथित मुख्य न्यायाधीशांच्या टिप्पणीच्या पार्श्वभूमीवर सोशल मीडियावर उदयास आली होती. दहा दिवसांत तिचे फॉलोअर्स दोन कोटींहून अधिक झाल्याचा दावा करण्यात आला होता.

सायबर हल्ल्याचा दावा; अकाउंट ऑफलाइन –

दरम्यान, ‘दिमागी नक्सल जनता पार्टी’च्या X अकाउंटवरून सोमवारी इन्स्टाग्राम पेजवर सायबर हल्ले होत असल्याचा दावा करण्यात आला. ‘आमचा आवाज दाबण्यात ते यशस्वी होतात का, ते पाहू’, अशा आशयाची पोस्ट करण्यात आली होती.

यानंतर काही वेळातच ‘Dimagi Naxal Party’चे इन्स्टाग्राम पेज ऑफलाइन झाले. पेज उपलब्ध नसल्याचे दिसून आले. यापूर्वी पोस्ट केलेल्या स्टोरीजमध्येही सायबर हल्ल्याचा दावा करण्यात आला होता. मात्र, या दाव्याची स्वतंत्र पुष्टी झालेली नाही.

PM मोदींच्या ‘दिमागी नक्सल’ वक्तव्यावरून राजकीय वाद –

१५ ऑगस्टच्या भाषणात पंतप्रधान मोदी यांनी सशस्त्र नक्षलवादाला देशाने मोठ्या प्रमाणात मागे ढकलले असले, तरी काही ‘दिमागी नक्सल’ वैचारिक पातळीवर तरुणांची दिशाभूल करून देशात अस्थिरता निर्माण करण्याच्या प्रयत्नात असल्याचे म्हटले होते. अशा लोकांना ओळखून त्यांना अलग ठेवण्याचे आवाहनही त्यांनी केले.

या वक्तव्यावर विरोधकांनी आक्षेप घेतला. काँग्रेसचे ज्येष्ठ नेते आणि माजी केंद्रीय गृहमंत्री पी. चिदंबरम यांनी ‘दिमागी नक्सल’ असल्याचा अभिमान असल्याचे म्हटले. त्यांनी या शब्दाची तुलना ‘अर्बन नक्सल’, ‘आंदोलनजीवी’ आणि ‘टुकडे-टुकडे गँग’ यांसारख्या पूर्वी वापरल्या गेलेल्या विशेषणांशी केली.

काँग्रेसचे सरचिटणीस जयराम रमेश यांनीही मोदींच्या वक्तव्याला त्यांच्या ‘हताशेचे स्पष्ट संकेत’ असे म्हटले.

दरम्यान, केंद्रीय संसदीय कार्यमंत्री किरेन रिजिजू यांनी स्पष्टीकरण देताना पंतप्रधानांनी विरोधी पक्षातील नेत्यांना ‘दिमागी नक्सल’ म्हटलेले नसल्याचे सांगितले. माओवाद्यांना समर्थन देणारे, भारतीय संविधान न मानणारे, फुटीरतावाद्यांच्या बाजूने उभे राहणारे, कलम ३७०चे समर्थन करणारे तसेच ईशान्य भारताला देशापासून वेगळे करण्याची भूमिका घेणाऱ्यांसाठी हा शब्द वापरल्याचे त्यांनी स्पष्ट केले.