बारामती (प्रतिनिधी)- महाराष्ट्र नवनिर्माण सेनेचे पदाधिकारी व कार्यकर्ते लवकरच महायुतीच्या उमेदवारांच्या प्रचारात सहभागी होणार असल्याची माहिती प्रदेश उपाध्यक्ष अँड. सुधीर पाटसकर यांनी दिली. राज ठाकरे यांनी लोकसभा निवडणुकीसाठी पंतप्रधान नरेंद्र मोदी यांना पाठिंबा जाहिर केला आहे. त्यांच्या निर्देशानुसार राज्यातील सर्वच लोकसभा मतदारसंघासाठी नेते व सरचिटणीस यांची मुख्य समन्वयक म्हणून नेमणूक केली आहे. पुण्यासाठी अमित ठाकरे, राजेंद्र वागस्कर, किशोर शिंदे, बाळा शेंडगे यांची तर शिरुरसाठी राजेंद्र (बाबू) वागस्कर, अजय शिंदे, मावळसाठी नितीन सरदेसाई व रणजित शिरोळे, अमेय खोपकर तर बारामती, सोलापूर व माढा या मतदारसंघांसाठी दिलीप धोत्रे व अँड. सुधीर पाटसकर यांच्याशी संपर्क साधण्याचे आवाहन मनसेने केले आहे. महायुतीच्या उमेदवारांच्या प्रचारासाठी संबंधित पक्षाच्या पदाधिका-यांनी मनसेच्या वरील पदाधिकाऱ्यांशी संपर्क करावा असेही सांगण्यात आले आहे. लवकरच मनसेच्या सर्व अंगीकृत संघटनांच्या पदाधिकारी व कार्यकर्त्यांचा मेळावा घेऊन राज ठाकरे यांच्या आदेशानुसार संबंधित लोकसभा मतदारसंघातील महायुतीच्या उमेदवारांच्या प्रचारात मनसे सहभागी होईल – अॅड. सुधीर पाटसकर.
