Diljit Dosanjh: प्रसिद्ध पंजाबी गायक आणि अभिनेता दिलजीत दोसांझ सध्या त्यांच्या नवीन ‘AURA’ या अल्बमच्या वर्ल्ड टूर वर आहेत. नुकत्याच ऑस्ट्रेलियातील कार्यक्रमादरम्यान त्यांना काही लोकांच्या रेसिस्ट टिप्पणींचा सामना करावा लागला. मात्र, दिलजीत यांनी त्यावर अतिशय संयमाने आणि शालीनतेने प्रतिक्रिया दिली.

ऑस्ट्रेलियात ‘कॅब ड्रायव्हर’ म्हणून खिल्ली उडवली

दिलजीत यांनी आपल्या यूट्यूब व्हिडिओमध्ये सांगितले की, ते जेव्हा ऑस्ट्रेलियात पोहोचले, तेव्हा विमानतळावर पॅपराझींनी त्यांचे फोटो घेतले. हे फोटो सोशल मीडियावर व्हायरल झाल्यानंतर काही लोकांनी त्यांच्या पोस्टवर “नवा ऊबर ड्रायव्हर आला”, “नवीन 7-11 कर्मचारी पोहोचला” अशा टोमणे मारणाऱ्या कमेंट्स केल्या.

या प्रकाराबद्दल बोलताना त्यांनी सांगितले,

“मी असे अनेक रेसिस्ट कमेंट्स पाहिले आहेत, पण मला वाटतं जगाला एकत्र राहण्याची गरज आहे. त्यात कोणत्याही सीमारेषा नसाव्यात.”

ते म्हणाले, “मला कॅब ड्रायव्हर किंवा ट्रक ड्रायव्हरशी तुलना करण्यात काहीही वाईट वाटत नाही.
कारण ट्रक ड्रायव्हर नसतील, तर आपल्या घरापर्यंत अन्न कसं पोहोचेल?
हे लोक देशाचा कणा आहेत. मी अशा टिप्पणी करणाऱ्यांवरही प्रेमच करतो, मला राग येत नाही.”
त्यांच्या या उत्तराने चाहत्यांच्या मनाला स्पर्श केला. सोशल मीडियावर लोकांनी त्यांच्या विनम्रतेचे आणि सकारात्मक दृष्टिकोनाचे भरभरून कौतुक केले.

दिलजीतच्या आगामी चित्रपट आणि प्रकल्प

वर्कफ्रंटबद्दल बोलायचं झालं तर, दिलजीत नुकतेच ‘सरदार जी 3’ आणि हिंदी चित्रपट ‘डिटेक्टिव शेरदिल’ मध्ये दिसले.
‘सरदार जी 3’ मध्ये पाकिस्तानी अभिनेत्री हानिया आमिर यांच्या कास्टिंगमुळे काही वाद निर्माण झाला होता, त्यामुळे हा चित्रपट भारतात अद्याप प्रदर्शित झालेला नाही, मात्र परदेशात त्याला चांगला प्रतिसाद मिळत आहे.
लवकरच दिलजीत ‘बॉर्डर 2’ या मोठ्या बजेटच्या चित्रपटात दिसणार आहेत, ज्यात सनी देओल, वरुण धवन आणि अहान शेट्टी यांच्याही भूमिका आहेत.

१५ ऑक्टोबरला त्यांनी आपला नवीन अल्बम ‘AURA’ लाँच केला, ज्याला जगभरातील चाहत्यांचा प्रचंड प्रतिसाद मिळत आहे.

दिलजीत दोसांझ यांनी पुन्हा एकदा दाखवून दिले की, मोठेपण केवळ लोकप्रियतेत नाही, तर विनम्रतेत आणि मनाच्या उदारपणात दडलेले असते.