Dilip Khedkar : निवृत्त सनदी अधिकारी आणि वादग्रस्त पूजा खेडकरचे वडील दिलीप खेडकर यांच्या पाथर्डी तालुक्यातील भालगाव येथील घरावर लाचलुचपत प्रतिबंधक विभागाने (एसीबी) मंगळवारी (२९ सप्टेंबर) पहाटे छापा टाकला. नाशिक आणि अहिल्यानगर येथील पथकांनी एकाचवेळी ही कारवाई केली. या कारवाईत घरातील विविध कागदपत्रे ताब्यात घेण्यात आली.

दिलीप खेडकर आणि त्यांच्या पत्नी डॉ. मनोरमा खेडकर यांच्याकडे ज्ञात उत्पन्नापेक्षा सुमारे १३ कोटी ३० लाख रुपयांची बेहिशेबी मालमत्ता आणि खर्च आढळल्याचा एसीबीचा आरोप आहे. याप्रकरणी दोघांविरोधात गुन्हा दाखल करण्यात आला आहे. चौकशीत ज्ञात उत्पन्नाच्या तुलनेत १०२ टक्के अधिक मालमत्ता आढळल्याचे एसीबीकडून सांगण्यात आले.

दिलीप खेडकर यांच्या संपत्तीची चौकशी करण्याची तक्रार एसीबीकडे केली होती. त्यानंतर १९९५ ते २०२३ या कालावधीतील खेडकर यांचे उत्पन्न, खर्च, व्यवहार आणि मालमत्तेची तपासणी करण्यात आली. या कारवाईत ३० हून अधिक अधिकारी-कर्मचारी सहभागी झाल्याची माहिती आहे.

खेडकर यांच्या नावावर अहिल्यानगर, पुणे, हवेली, पवई, बारामती, भालगाव, मुळशी, औंध, पनवेल, खरवंडी कासार आणि शिरूर कासार या ठिकाणी स्थावर मालमत्ता असल्याचे कागदपत्रांमधून समोर आल्याचे सांगण्यात आले.

दिलीप खेडकर हे निवृत्त सनदी अधिकारी असून त्यांनी २०१९ मध्ये अहमदनगर लोकसभा मतदारसंघातून वंचित बहुजन आघाडीच्या उमेदवारीवर निवडणूक लढवली होती. त्यांच्या निवडणूक प्रतिज्ञापत्रात सुमारे ४० कोटी रुपयांची संपत्ती जाहीर करण्यात आली होती.