भारतासाठी अभूतपूर्व आव्हाने PM Modi

“या युद्धाने भारतासमोर अभूतपूर्व आव्हाने उभी केली आहेत. ही आव्हाने आर्थिक, राष्ट्रीय सुरक्षेशी निगडित आणि मानवतावादी अशा तिन्ही पातळ्यांवर आहेत,” असे पंतप्रधान म्हणाले. युद्धग्रस्त देशांशी भारताचे मोठे व्यापारी संबंध आहेत. हा प्रदेश इतर देशांशी व्यापारासाठीही महत्त्वाचा मार्ग आहे, विशेषतः कच्चे तेल आणि वायूच्या गरजेसाठी. शिवाय सुमारे एक कोटींहून अधिक भारतीय या प्रदेशात राहतात व काम करतात. त्यामुळे भारताची चिंता स्वाभाविकपणे अधिक आहे. होर्मुज सामुद्रधुनीसारख्या जलमार्गांमध्ये अडथळा आणणे अस्वीकार्य असल्याचे पंतप्रधानांनी स्पष्टपणे नमूद केले. भारतीय जहाजांची सुरक्षित वाहतूक सुनिश्चित करण्यासाठी मुत्सद्देगिरीच्या माध्यमातून सतत प्रयत्न सुरू असल्याचेही त्यांनी सांगितले.

हेही वाचा – सोनं 10 तर चांदी 20 हजारांनी कोसळली; जाणून घ्या 5 प्रमुख कारणे 

ऊर्जा विविधीकरण आणि पायाभूत सुविधांची ताकद

PM Modi: “युद्ध दीर्घकाळ चालणार”; मोदींनी लोकसभेत सांगितलं भारतापुढील सर्वात मोठं संकट

पंतप्रधान मोदी यांनी गेल्या ११ वर्षांत इथेनॉल उत्पादन आणि मिश्रणावर झालेल्या कामाचा उल्लेख केला. एक दशकापूर्वी देशाची इथेनॉल मिश्रण क्षमता केवळ एक ते दीड टक्के होती, आज ती २० टक्क्यांच्या जवळ पोहोचली आहे. याचा परिणाम म्हणून दरवर्षी सुमारे ४.५ कोटी बॅरल तेल आयात वाचवता येत आहे. रेल्वे विद्युतीकरणामुळेही दरवर्षी १८० कोटी लिटर डिझेलची बचत होत आहे. मेट्रो नेटवर्क २०१४ मधील २५० किलोमीटरवरून आता ११०० किलोमीटरहून अधिक झाले आहे. या संरचनात्मक सुधारणांमुळे सध्याच्या संकटात भारताला मोठा आधार मिळत आहे, असे त्यांनी सांगितले.

वीज आणि कोळसा पुरवठा सुरक्षित

उन्हाळ्यात विजेची मागणी वाढणार असल्याची जाणीव व्यक्त करताना पंतप्रधान म्हणाले की सध्या देशातील सर्व वीजनिर्मिती केंद्रांकडे पुरेसा कोळसा साठा उपलब्ध आहे. सलग दुसऱ्या वर्षी भारताने १०० कोटी टनांहून अधिक कोळसा उत्पादनाचा विक्रम नोंदवला आहे. वीजनिर्मितीपासून वितरणापर्यंत सर्व यंत्रणांचे सतत निरीक्षण केले जात आहे.

अन्नसुरक्षा भक्कम

युद्धाचा शेतीवर होणाऱ्या परिणामाबाबत बोलताना पंतप्रधानांनी आश्वासन दिले की देशातील अन्नधान्याचे साठे पुरेसे आहेत. खरीप पेरणी सुरळीत होण्यासाठी खतांची पुरेशी व्यवस्था करण्यात आली आहे. जागतिक संकटांचा भार देशातील शेतकऱ्यांवर पडू दिला जाणार नाही, असे त्यांनी ठामपणे सांगितले.

हेही वाचा – ट्रम्पच्या ‘त्या’ इशाऱ्याने बाजार हादरला! सेन्सेक्स 1836 अंकांनी कोसळला, निफ्टी 22,512 वर बंद; टायटन 7% घसरला 

३ लाख ७५ हजार भारतीय सुरक्षित परतले

युद्ध सुरू झाल्यापासून आतापर्यंत ३ लाख ७५ हजारांहून अधिक भारतीय सुरक्षितपणे देशात परतले आहेत. केवळ ईरानमधून एक हजारांहून अधिक भारतीय परतले असून त्यात ७०० हून अधिक वैद्यकीय विद्यार्थी आहेत. होर्मुज सामुद्रधुनीत अडकलेली अनेक भारतीय जहाजेही आता देशात दाखल झाली आहेत. भारतात आणि परदेशात २४ तास, सातही दिवस नियंत्रण कक्ष आणि आपत्कालीन हेल्पलाइन सुरू असल्याची माहितीही त्यांनी दिली. काही भारतीयांना दुर्दैवाने प्राण गमवावे लागले आणि काही जखमी झाले, मात्र प्रत्येकाला मदत पोहोचवण्याचे काम अखंडपणे सुरू असल्याचे त्यांनी सांगितले.

सामरिक पेट्रोलियम साठा आणि दीर्घकालीन सज्जता

भारताकडे सध्या ५३ लाख मेट्रिक टनांचा सामरिक पेट्रोलियम साठा असून ६५ लाख मेट्रिक टनांच्या साठ्याची व्यवस्था केली जात आहे. गेल्या ११ वर्षांत देशाची शुद्धीकरण क्षमताही लक्षणीयरीत्या वाढली आहे. विविध देशांतील पुरवठादारांशी सरकार सतत संपर्कात असून जेथून शक्य असेल तेथून तेल आणि वायू पुरवठा सुरू ठेवण्याचे प्रयत्न सुरू आहेत.

राष्ट्रीय सतर्कता आणि एकजुटीचे आवाहन

“अशा संकटाच्या काळात काही घटक परिस्थितीचा गैरफायदा घेण्याचा प्रयत्न करतात,” असा इशारा देत पंतप्रधानांनी सांगितले की किनारपट्टी सुरक्षा, सीमा सुरक्षा आणि सायबर सुरक्षा यासह कायदा व सुव्यवस्था राखणाऱ्या सर्व यंत्रणांना सतर्क केले आहे. अफवा पसरवणाऱ्यांना यश मिळू देऊ नका, असेही आवाहन त्यांनी केले. कोरोना महामारीच्या काळाप्रमाणेच एकजुटीने या आव्हानाला सामोरे जाण्याचे आवाहन करत पंतप्रधान मोदी म्हणाले, “कठीण जागतिक परिस्थिती दीर्घकाळ राहू शकते, त्यामुळे आपण सज्ज आणि एकजूट राहिले पाहिजे.”

PM Modi: “युद्ध दीर्घकाळ चालणार”; मोदींनी लोकसभेत सांगितलं भारतापुढील सर्वात मोठं संकट; तेल, वीज, अन्न सगळ्यांवर होणार परिणाम?