मुंबई – अभिनेता सिद्धार्थ जाधव सध्या आपल्या ‘सर्कस’ या सिनेमामुळे चांगलाच चर्चेत आहे. सिद्धार्थ हिंदी चित्रपटात दुसऱ्यांदा अभिनेता रणवीर सिंग सोबत दिसला आहे. मराठीप्रमाणे सिद्धार्थने हिंदीमध्ये देखील आपल्या जबरदस्त कॉमेडी स्टाईलची वेगळी छाप पाडली आहे. यामुळेच सोशल मीडियावर देखील सिद्धूची फॅनफॉलोविंग दिवसेंदिवस वाढत चालली आहे. नुकतंच सिद्धूने आपल्या इंस्टाग्रामवर स्वतःचे काही नवीन फोटो शेअर केले आहेत. सध्या त्याचा अतरंगी लूक चांगलाच व्हायरल होत असून, फॅन्सला देखील अभिनेत्याचा हा अवतार आवडला आहे. तर, काहींनी सिद्धूला ट्रोल सुद्धा केल्याचं दिसून येत आहे.
सिद्धार्थला सुद्धा रणवीर प्रमाणेच फॅशनच्याबाबतीत विविध प्रयोग करायला आवडतात. आताही त्याने हटके ड्रेस परिधान केला आहे. शेअर केलेल्या या फोटोंमध्ये रंगीबेरंगी शर्ट तसेच त्याच रंगाची पँट सिद्धार्थने परिधान केली आहे. यावर त्याने लाल रंगाचं जॅकेट परिधान केलं आहे. तसेच त्याने शूज घातले आहेत.
View this post on Instagram
दरम्यान, त्याचा हा लूक पाहून नेटकऱ्यांना रणवीर सिंगची आठवण झाली आहे. “रणवीर सिंगच्या नादी लागू नको, वाण नाही पण गुण लागला, रणवीरचा नाद सोड, तुला रणवीर सिंग चावला की काय? अशा अनेक कमेंट नेटकऱ्यांनी केल्या आहेत. तर काहींनी सिद्धार्थच्या या लूकचं कौतुकही केलं आहे.
अभिनेता सिद्धार्थ जाधव आणि रणवीर सिंग यांनी सिम्बा या रोहित शेट्टीच्या चित्रपटात एकत्र काम केलं होत. त्यानंतर दोघांमध्ये चांगलीच गट्टी जमल्याचे अनेकदा दिसून आले. अनेकदा हे दोघेही एखाद्या कार्यक्रमात सोबत दिसायचे तर कधी सोशल मीडियावर एकमेकांबाबत पोस्ट करायचे. आता पुन्हा एकदा हे दोन अभिनेते ‘सर्कस’ सिनेमामुळे एकत्र आले आहेत.
