लंडन: क्रिकेट विश्वातील सर्वोत्तम अंपायरांपैकी एक म्हणून ओळखले जाणारे डिकी बर्ड यांचे वयाच्या 92 व्या वर्षी निधन झाले आहे. दोन दशकांहून अधिक काळ आंतरराष्ट्रीय क्रिकेटमध्ये अंपायर म्हणून त्यांनी आपली अमीट छाप सोडली. डिकी बर्ड यांनी 66 कसोटी आणि 69 वनडे सामन्यांमध्ये अंपायरिंग केले, यामध्ये 1975, 1979 आणि 1983 च्या वनडे विश्वचषक फायनल सामन्यांचा समावेश आहे. ऐतिहासिक क्षणांचे साक्षीदार 1983 च्या विश्वचषक फायनल सामन्यात भारताने पहिल्यांदा विश्वचषक जिंकला, त्या सामन्यात डिकी बर्ड अंपायर होते. या सामन्यात मोहिंदर अमरनाथच्या गोलंदाजीवर डिकी बर्ड यांनी मायकल होल्डिंगला एलबीडब्ल्यू आऊट दिले, आणि त्याच क्षणी भारताने इतिहास रचला.1996 मध्ये डिकी बर्ड यांनी आंतरराष्ट्रीय अंपायरिंगमधून निवृत्ती घेतली. विशेष म्हणजे, त्यांच्या शेवटच्या आंतरराष्ट्रीय सामन्यात सौरव गांगुली आणि राहुल द्रविड यांनी आंतरराष्ट्रीय क्रिकेटमध्ये पदार्पण केले होते. यॉर्कशायर क्रिकेट क्लबकडून श्रद्धांजली यॉर्कशायर क्रिकेट क्लबने डिकी बर्ड यांना श्रद्धांजली वाहताना म्हटले, “डिकी बर्ड यांनी आंतरराष्ट्रीय अंपायर म्हणून शानदार कारकीर्द घडवली. क्रिकेटच्या इतिहासातील सर्वात प्रसिद्ध आणि लोकप्रिय अंपायर म्हणून त्यांचे नाव कायम स्मरणात राहील.” क्लबने पुढे नमूद केले की, “त्यांनी 66 कसोटी आणि 69 वनडे सामन्यांमध्ये अंपायरिंग केले, यामध्ये तीन विश्वचषक फायनलचा समावेश आहे. त्यांच्या प्रामाणिकपणा आणि निष्पक्ष शैलीमुळे खेळाडू आणि चाहत्यांनी त्यांचे नेहमीच कौतुक केले.” यॉर्कशायरशी विशेष नाते डिकी बर्ड आणि यॉर्कशायर क्रिकेट यांचे नाते अतुट होते. 2014 मध्ये त्यांना यॉर्कशायर काउंटी क्रिकेट क्लबचे अध्यक्ष म्हणून नियुक्त करण्यात आले होते, ही भूमिका त्यांनी अभिमान आणि निष्ठेने पार पाडली. डिकी बर्ड यांनी यॉर्कशायर आणि लिसेस्टरशायरकडून प्रथम श्रेणी क्रिकेट खेळले होते. त्यांनी 93 प्रथम श्रेणी सामन्यांमध्ये 3,314 धावा केल्या आणि दोन लिस्ट ए सामनेही खेळले. क्रिकेटमधील योगदान 1973 मध्ये डिकी बर्ड यांनी आंतरराष्ट्रीय अंपायर म्हणून आपल्या कारकीर्दीला सुरुवात केली. त्यांच्या निष्पक्ष निर्णयक्षमतेमुळे आणि खेळाबद्दलच्या समर्पणामुळे ते क्रिकेट विश्वात आदराचे स्थान मिळवू शकले. त्यांच्या निधनाने क्रिकेट विश्वाने एका महान व्यक्तिमत्त्वाला गमावले आहे, ज्यांचे योगदान कायम स्मरणात राहील.
