DHULE :  हिंदू-मुस्लिम एकतेचे प्रतीक मानल्या जाणाऱ्या धुळ्यातील मानाच्या खुनी गणपतीचे वाजत-गाजत आगमन झाले. टाळ-मृदुंगाचा गजर आणि पारंपरिक वाद्यांच्या निनादात गणरायाची भक्तिमय मिरवणूक काढण्यात आली. त्यानंतर उत्साही वातावरणात गणपती बाप्पाची प्राणप्रतिष्ठाही संपन्न झाली.

खुनी गणपतीची ही परंपरा स्वातंत्र्यपूर्व काळापासून सुरू असल्याचे सांगितले जाते. लोकमान्य टिळकांचे शिष्य खांबोठे गुरुजी यांनी या गणेशोत्सवाची सुरुवात केल्याचे मानले जाते. तेव्हापासून दरवर्षी पारंपरिक पद्धतीने खुनी गणपतीची मिरवणूक काढली जाते.

यंदाही मोठ्या संख्येने भाविक मिरवणुकीत सहभागी झाले होते. टाळ-मृदुंगाच्या गजरात आणि ‘गणपती बाप्पा मोरया’च्या जयघोषात गणरायाचे उत्साहात स्वागत करण्यात आले. या माध्यमातून धुळ्यातील हिंदू-मुस्लिम ऐक्याची जुनी परंपरा आजही कायम असल्याचे पाहायला मिळाले.