Dhruv Rathee : २०१८ मधील मानहानीच्या खटल्यात युट्युबर ध्रुव राठी (Dhruv Rathee) यांना दिल्लीतील एका न्यायालयाने पुन्हा समन्स बजावले आहे. गेल्या सात वर्षांपासून राठी हे ऑस्ट्रियामध्ये राहत असून राजधानीत सुरू असलेल्या निदर्शनांसाठी ते भारतात आले आहेत, याची न्यायालयाने दखल घेतली.

भाजप आयटी सेलचे सदस्य विकास पांडे यांनी २०१८ मध्ये ध्रुव राठी यांच्या एका व्हिडिओविरुद्ध फौजदारी मानहानीची तक्रार दाखल केली होती. या व्हिडिओमध्ये भाजप आयटी सेलने आपल्याला बदनाम करण्यासाठी लाच देण्याचा प्रयत्न केल्याचा आरोप राठी (Dhruv Rathee) यांनी केला होता. या प्रकरणी न्यायिक दंडाधिकारी राहुल जैन यांच्‍यासमोर सुनावणी सुरू आहे.

तक्रारदाराच्या वतीने ॲड. समक्ष शर्मा यांनी न्यायालयाला सांगितले की, राठी हे सामान्यतः ऑस्ट्रियामध्ये राहतात आणि दिल्लीतील सीजेपीच्‍या आंदोलनात सहभागी होण्‍यासाठी भारतात आले आहेत. आता समन्स बजावण्याची प्रक्रिया जलद गतीने पूर्ण करण्यासाठी पुन्हा समन्स जारी करणे आवश्यक आहे, असा युक्‍तीवाद केला.

न्यायालयाने आदेशात म्हटले आहे की, उपलब्ध कागदपत्रांवरून तक्रारदार गेल्या अनेक वर्षांपासून आरोपी राठी यांना समन्स बजावण्याचा प्रयत्न करत आहेत. ध्रुव राठी (Dhruv Rathee) यांना हरियाणातील गुरुग्राम येथील त्यांच्या पत्त्यावर पुन्हा समन्स बजावण्यात यावे, असे नमूद केले आहे. दरम्‍यान, राठी यांना यापूर्वी जुलै २०१९ मध्ये समन्स बजावण्यात आले होते.