Dhangar Vithoba Yatra – श्री धनगर विठोबा देवाच्या यात्रेस पालखी व सासनकाठ्यांचे पूजन करून यात्रेस प्रारंभ झाला. सोमवार (दि. २३) ते दि. २८ मार्चअखेर कुस्ती मैदान, खेळ पैठणीचा, बैलगाडी शर्यतीसह विविध धार्मिक कार्यक्रमांचे आयोजन करण्यात आल्याचे देवस्थान ट्रस्टने सांगितले. येथील चांदणी चौकाजवळ असलेल्या श्री धनगर विठोबा देवाच्या यात्रेत महाराष्ट्रासह कर्नाटकातील भाविक हजेरी लावतात. आज देवस्थान ट्रस्ट व धनगर समाजबांधवांनी देवाच्या पालखीचे व सासनकाठ्यांचे आतषबाजीत मंदिरात स्वागत केले. सोमवार दि. २३ मार्च रोजी सायंकाळी सातला श्री देवाचा धाकटा छबिना व गजीनृत्य, मंगळवार दि. २४ मार्च रोजी श्री देवाचा थोरला छबिना व ओवी गायनाचा कार्यक्रम व मायणीसह वीरकरवाडी, अंबवडे, बनपुरी, कोकरेवाडी गावाचे गजी नृत्याचा कार्यक्रम होणार आहे. बुधवार दि. २५ मार्च रोजी यात्रेचा मुख्य दिवस असून यादिवशी पाकाळणी, देवाची भाकणूक व महाप्रसादाचा कार्यक्रम, तर सकाळी विश्वात्मा मल्टीस्पेशालिटी हॉस्पिटलच्यावतीने आरोग्य तपासणी शिबिर आयोजित करण्यात आले आहे. गुरुवार दि. २६ मार्च रोजी सकाळी नऊ वाजल्यापासून मायणी- वडूज रस्त्याच्या मैदानावर बैलगाडी शर्यतीचे आयोजन करण्यात आले असून, त्यासाठी अनुक्रमे एक लाख, ७९ हजार, ५१ हजार, ३१ हजार, २१ हजार, ११ हजार व सात हजारांची बक्षीसे देण्यात येणार आहेत. शुक्रवार दि. २७ मार्च रोजी दुपारी तीन वाजता राज बहुउद्देशीय सामाजिक संस्थेमार्फत होम मिनिस्टर खेळ पैठणीचा या महिलांसाठी कार्यक्रमाचे आयोजन करण्यात आले आहे. श्री धनगर विठोबा मंदिर परिसरातच दि. २८ मार्च रोजी दुपारी तीन वाजता निकाली जंगी कुस्त्यांचे मैदान भरविण्यात येणार असल्याचे श्री धनगर विठोबा देवस्थान ट्रस्टने सांगितले.
