Dhananjay Munde | Karuna Munde – तीन महिन्यांनंतरही राज्यात मस्साजोग येथील सरपंच संतोष देशमुख हत्या प्रकरणाने राजकारण व्यापलेले आहे. हत्येच्या प्रकरणात दाखल झालेल्या आरोपपत्रात मंत्री धनंजय मुंडे यांचा निकटवर्तीय वाल्मिक कराड हाच मुख्य सूत्रधार असल्याचे समोर आले आहे. त्यामुळे पुन्हा एकदा धनंजय मुंडे यांच्या राजीनाम्याचा मुद्दा ऐरणीवर आला आहे. मात्र, अश्यातच करुणा शर्मा-मुंडे यांनी केलेल्या एका पोस्टमुळे मुंडेंचा राजीनामा सोमवारपर्यंत होणार असल्याचे म्हटले जात आहे. यावर बीडचे खासदार बजरंग सोनवणे यांनी ‘देर है, पर अंधेर नही!’ असे सूचक वक्तव्य केले आहे. करुणा शर्मा-मुंडे एका वृत्तवाहिनीशी बोलताना म्हणाल्या, ‘वरिष्ठ नेत्यांनी धनंजय मुंडे यांचा राजीनामा मागितला आहे आणि तो राज्य विधिमंडळाच्या अर्थसंकल्पीय अधिवेशनापूर्वी जाहीर केला जाईल. मुंडे यांचा राजीनामा दोन दिवसांपूर्वी मागितला गेला होता आणि त्यांना त्यांच्या पदावरून पायउतार व्हावे लागेल. तसेच मुंडे यांनी यापूर्वीच सांगितले होते की कराड हे त्यांचे जवळचे सहकारी आहेत आणि जर दोषी आढळले तर ते राजीनामा देतील, असेही त्यांनी सांगितले. बीड जिल्ह्यातील मस्साजोगचे सरपंच संतोष देशमुख यांची ९ डिसेंबर २०२४ रोजी निर्घृण हत्या करण्यात आली. याप्रकरणात सीआयडीने दोषारोपपत्र दाखल केले. त्यात धनंजय मुंडे यांचा निकटवर्तीय वाल्मिक कराड हाच या हत्येचा मास्टरमाईंड असल्याचा दावा करण्यात आला आहे. त्यानंतर करुणा मुंडे यांच्या फेसबुक पोस्टने खळबळ उडाली आहे. ३ मार्च रोजी धनंजय मुंडे राजीनामा देतील, असा दावा करुणा मुंडे यांनी केला आहे. वाल्मिक कराड आणि त्याच्या गँगला हत्येसाठी मदत करणारे, त्यांना फरार होण्यासाठी मदत करणारे, फरार असताना त्यांना सर्व माहिती देणारे पोलिस अधिकारी आणि इतरांना सहआरोपी करण्याची मागणी जोर धरत आहे. तर या प्रकरणात पहिल्यापासून वाल्मिक कराडच्या अटकेपासून आणि धनंजय मुंडे यांच्या राजीनाम्याच्या मागणीसाठी आग्रही असलेले खासदार बजरंग सोनवणे यांनी करुणा मुंडे यांच्या पोस्टवर सूचक विधान केले आहे.
