सोलापूर : सोलापूर जिल्ह्यात राष्ट्रवादी(शप) पक्षाचे माढ्याचे खासदार धैर्यशील मोहिते पाटील यांनी अकलूज नगरपालिका जिंकल्यावर धुरंदर स्टाईलने आनंद साजरा केला होता. आता, महापालिका निवडणुकांच्या अनुषंगानेही पक्षाने धैर्यशील मोहिते-पाटील यांना सोलापूर महापालिका निवडणूक प्रभारी म्हणून जबाबदारी दिली आहे. त्यानंतर, प्रथमच त्यांनी सोलापुरात अजित पवारांच्या राष्ट्रवादीसोबत आघाडीबाबत भाष्य केले आहे. पुणे आणि पिंपरी चिंचवडमध्ये दोन राष्ट्रवादी एकत्र आल्याने राज्यभर शरद पवार-अजित पवारांच्या एकत्र येण्याची चर्चा सुरू झाली आहे. सोलापूर जिल्ह्यात मोहिते पाटील यांना मानणारा मोठा वर्ग आहे. त्यामुळे बेरजेचे राजकारण करण्यासाठी मोहिते पाटील अकलूज पॅटर्न सोलापूर महापालिकेत राबवण्याचा प्रयत्न करतील. पक्षाकडून तसा प्लॅन आखला जात आहे. त्यानुसार धैर्यशील मोहिते पाटील यांनी काँग्रेस आणि ठाकरेसेनेशी चर्चा सुरू केली आहे. महापालिकेसाठी मोहिते-पाटील यांच्यावर जबाबदारी सोपविण्यात आली असून मिशन सोलापूर महापालिका सुरू झाले आहे. सोलापूर महापालिकेसाठी महाविकास आघाडी एकत्र लढणार असून त्या संदर्भात चर्चा सुरू झाल्याचे त्यांनी सांगितले. सोलापूर महापालिकेसाठी जर अजित पवार यांच्या पक्षाकडून प्रस्ताव आल्यास त्यांनाही आघाडीत सामील करून घेतले जाणार असल्याचे त्यांनी म्हटले आहे. भाजपला रोखण्यासाठी त्यांनाही आघाडीत सोबत घेऊन सोलापुरात भाजपविरुद्ध आघाडी केली जाईल. याबाबत वरिष्ठांशी आणि स्थानिक पदाधिकाऱ्यांशी चर्चा करून अजित पवार यांच्यासोबत जाण्याबाबत निर्णय घेतला जाईल, असे त्यांनी म्हटले आहे.
