Vidyanand Bapat | Devendra Fadnavis : गणेशोत्सवात डीजे आणि साऊंड सिस्टीमच्या वापराला विरोध करणारे विद्यानंद बापट यांच्यावर पुण्यातील टिळक रस्त्यावरील कशाळे चौकात झालेल्या हल्ल्यानंतर आता मुख्यमंत्री देवेंद्र फडणवीस यांनी प्रतिक्रिया दिली आहे.

पत्रकारांनी बापट यांच्या शुद्ध मराठीबाबत प्रश्न विचारला असता, फडणवीस म्हणाले, “त्यांची मराठी सध्या ट्रेंडिंग आहे. इतकी शुद्ध आणि सुंदर मराठी ऐकायला आनंद होतो. केवळ बापटच नव्हे, तर जेव्हा कोणीही अशी समृद्ध भाषा बोलतो तेव्हा ऐकून मनाला आनंद वाटतो. मात्र, विचार मांडताना ते सर्वसमावेशक असावेत आणि इतरांना त्याचा त्रास होणार नाही, ही अपेक्षा आहे.”

यावेळी त्यांनी मिश्कील शैलीत, “बापट यांच्यासारखी भाषा बोलायला मला तर ट्यूशनच घ्यावी लागेल!” अशी टिप्पणी करत उपस्थितांमध्ये हशा पिकवला. तर ते पुढे म्हणाले की, “सध्या बापट यांची मराठी सोशल मीडियावर चांगलीच ट्रेंडिंग आहे.

डीजे बंदीच्या निर्णयावर CM काय म्हणाले?

“डीजे बंदीची पॉलिसी एकदम तयार होणार नाही. आता आम्ही सर्वांना सांगितलं आहे की, चर्चेतून प्रश्न सोडवा. आमचा अनुभव असा आहे की, ज्या ठिकाणी चर्चा केली तिथे 90 ते 95 टक्के लोकं तयार होती.

त्यामुळे चर्चेतून हे घडवायचं, मग त्यानंतर त्याठिकाणी तसा आदेश काढायचा, अशा पद्धतीने काम सुरु आहे. थोडा वेळ देखील आपण दिला पाहिजे. पण दिशा पक्की आहे.

आपल्याला खूप प्रचंड ध्वनी प्रदूषणापासून दूर जावं लागेल. पोलीस आयुक्त आणि मंडळ यांच्याशी चर्चा करुन डीजेबाबत योग्य निर्णय होईल”, अशी प्रतिक्रिया मुख्यमंत्री देवेंद्र फडणवीस यांनी दिली.