बंगळुरू: माजी पंतप्रधान एच. डी. देवेगौडा यांनीही राज्यसभेची निवडणूक लढवण्याचा निर्णय घेतला आहे. ते उद्या मंगळवारी आपला निवडणूक अर्ज भरणार आहेत. कॉंग्रेस अध्यक्षा सोनिया गांधी यांनी त्यांना उमेदवारी अर्ज भरण्याची सूचना केल्यानंतर त्यांनी ही निवडणूक लढवण्याचा निर्णय घेतला आहे, अशी माहिती त्यांचे पुत्र व माजी मुख्यमंत्री एच. डी. कुमारस्वामी यांनी दिली.

ते म्हणाले की, अन्यही राष्ट्रीय नेत्यांनी त्यांना राज्यसभेचा अर्ज दाखल करण्याचा आग्रह धरला, ते स्वतः यासाठी उत्सुक नव्हते पण या नेत्यांच्या आग्रहामुळे त्यांनी ही निवडणूक लढवण्याचा निर्णय घेतला आहे, असे कुमारस्वामी यांनी सांगितले.

87 वर्षीय देवेगौडा हे या आधीही एकदा राज्यसभेचे सदस्य होते. त्यांची तेथील ही दुसरी टर्म असणार आहे. ते 1996 साली देशाचे पंतप्रधान होते. सन 2019 च्या लोकसभा निवडणुकीत त्यांचा 13 हजार मतांनी पराभव झाला होता. आता राज्यसभा निवडणुकीसाठी ते कॉंग्रेस व जेडीएस आघाडीचे संयुक्‍त उमेदवार असणार आहेत.

येत्या 19 जूनला कर्नाटकात राज्यसभेच्या चार जागांसाठी ही निवडणूक होत आहे. कॉंग्रेसकडे या विधानसभेत 68 आमदार असून त्यांना एक जागा सहज िंजंकता येणार आहे. त्यासाठी त्यांनी मल्लिकार्जुन खर्गे यांना उमेदवारी दिली आहे. जादाची मते देवेगौडा यांना दिली जातील त्यातून त्यांचाही विजय सहज होऊ शकेल. ही निवडणूक जिंकण्यासाठी 44 आमदारांची गरज आहे.