Devdutt Padikkal Equalled Virat Kohli Record in IND vs SL 2nd Test Colombo : भारत आणि श्रीलंका यांच्यातील कसोटी मालिकेतील दुसऱ्या सामन्यात नाणेफेक जिंकून प्रथम फलंदाजी करणाऱ्या भारतीय संघाची दमदार सुरुवात झाली आहे. या सामन्यात युवा फलंदाज देवदत्त पडिक्कलने (Devdutt Padikkal) सलग दुसरे शतक झळकावत सर्वांचे लक्ष वेधून घेतले आहे. त्याने पहिल्या गॉल कसोटीत १६७ धावांची मॅरेथॉन खेळी केल्यानंतर, पडिक्कलने कोलंबो कसोटीतही पहिल्या डावात ११७ धावांची शानदार खेळी साकारली. या खेळीसह त्याने थेट भारताचा माजी कर्णधार विराट कोहलीच्या (Virat Kohli) मोठ्या विक्रमाशी बरोबरी केली आहे.

देवदत्त पडिक्कलने विराट कोहलीच्या विक्रमाशी केली बरोबरी –

साई सुदर्शन दुखापतग्रस्त झाल्यानंतर कसोटी संघात मिळालेल्या संधीचे पडिक्कलने अक्षरशः सोने केले आहे. गॉल कसोटीत दोन्ही डावांत मिळून २०० हून अधिक धावा कुटणाऱ्या पडिक्कलने कोलंबोतही पहिल्या डावात ११७ धावांची खेळी साकारली. यासह श्रीलंकेच्या भूमीवर सर्वाधिक कसोटी शतके ठोकण्याच्या विक्रमात तो दोन शतकांसह विराट कोहलीच्या पंक्तीत जाऊन बसला आहे. या यादीत सचिन तेंडुलकर ५ शतकांसह अव्वल स्थानी असून, विनोद कांबळी, मोहम्मद अझरुद्दीन, नवज्योतसिंग सिद्धू आणि अजिंक्य रहाणे यांनीही प्रत्येकी दोन शतके झळकावली आहेत. तर वीरेंद्र सेहवाग, शिखर धवन आणि चेतेश्वर पुजारा यांच्या नावावर श्रीलंकेत प्रत्येकी तीन शतके आहेत.

सात वर्षांनंतर घडला चमत्कार; पुजारानंतर सलग दोन शतके ठोकणारा पहिला फलंदाज –

Stumps: It is Stumps on Day 1 in Colombo and India are 300/5 from 85 overs.

Devdutt Padikkal scored another fine century, whereas Gill made 50.

Link: https://t.co/r9FgXSdsMf #TeamIndia | #SLvIND pic.twitter.com/OTuvZSUvjY

— BCCI (@BCCI) August 23, 2026

भारतीय कसोटी संघातील क्रमांक-३ च्या स्थानावरील दीर्घकालीन पेच पडिक्कलने सोडवला आहे. भारताबाहेर (Overseas Test Series) खेळताना सलग दोन कसोटी सामन्यांत क्रमांक-३ वर फलंदाजी करत शतके झळकावणारा पडिक्कल हा गेल्या ७ वर्षांतील पहिला भारतीय फलंदाज ठरला आहे. यापूर्वी २०१८-१९ च्या ऐतिहासिक ऑस्ट्रेलिया दौऱ्यावर अनुभवी फलंदाज चेतेश्वर पुजाराने (Cheteshwar Pujara) मेलबर्न कसोटीत १०६ आणि त्यानंतर सिडनी कसोटीत १९३ धावांची मॅरेथॉन खेळी करत हा पराक्रम केला होता. ७ वर्षांनंतर पडिक्कलने पुन्हा या विक्रमाची पुनरावृत्ती केली आहे.

हेही वाचा – Quevin Castro Dies : धक्कादायक! सामन्यादरम्यान मैदानात कोसळल्यानंतर पोर्तुगालच्या स्टार फुटबॉलपटूचे निधन

टीम इंडियाची नंबर-३ ची डोकेदुखी कायमची मिटवली –

कसोटी क्रिकेटमध्ये भक्कम तंत्र आणि संयमी खेळाची गरज असणाऱ्या तिसऱ्या क्रमांकावर भारताचा बराच काळ संघर्ष सुरू होता. मात्र, श्रीलंकेविरुद्धच्या दोन्ही कसोटी सामन्यांत कठीण प्रसंगी खेळपट्टीवर टिकून राहून शतके झळकावल्यामुळे पडिक्कलने भारतीय कसोटी संघात तिसऱ्या क्रमांकावर आपली जागा पक्की केली आहे. त्याच्या या सातत्यपूर्ण आणि क्लासिक फलंदाजीमुळे भारतीय संघाने कोलंबो कसोटीवर पहिल्याच दिवशी मजबूत पकड मिळवली आहे.