Minakshi Shinde : ठाकरे गटाचे ठाण्यातील विभागप्रमुख प्रदीप पूर्णेकर यांच्या मृत्यू प्रकरणावरून राजकीय आरोप-प्रत्यारोप सुरू आहेत. ठाकरे गटाचे खासदार संजय राऊत यांनी शिंदे गटाच्या नगरसेविका मिनाक्षी शिंदे आणि त्यांच्या पतीवर गंभीर आरोप केले आहेत.

राऊत यांनी मिनाक्षी शिंदे यांचा उल्लेख ‘लेडी डॉन’ असा केला होता. या आरोपांनंतर अखेर मिनाक्षी शिंदे यांनी पत्रकार परिषद घेत आपली भूमिका स्पष्ट केली.

प्रदीप पूर्णेकर यांच्या मृत्यू प्रकरणाशी आपला कोणताही संबंध नसल्याचा दावा मिनाक्षी शिंदे यांनी केला. “माझ्याविरोधात कोणतेही पुरावे नसताना मला टार्गेट केलं जात आहे. एका महिलेला या प्रकरणात गोवण्याचा प्रयत्न केला जात आहे.” असा आरोप त्यांनी केला.

“केवळ आपण एकनाथ शिंदे यांच्या पक्षात असल्यामुळे आपल्यावर आरोप केले जात आहेत.” असंही त्यांनी म्हटलं आहे.

Sanjay Raut‘

‘एफआयआरमध्ये माझ्या नावाचा उल्लेख नाही’

प्रदीप पूर्णेकर यांच्या हत्येबाबत बोलताना मिनाक्षी शिंदे म्हणाल्या, “माझ्या प्रभागात दोन दिवसांपूर्वी प्रदीप पूर्णेकर यांची हत्या झाली. ही अत्यंत दुर्दैवी घटना आहे. एफआयआरमध्ये माझ्या नावाचा कुठेही उल्लेख नव्हता. मात्र, त्यानंतर काही राजकीय नेते आले आणि माझं नाव या प्रकरणात गोवण्याचा प्रयत्न केला.”

संजय राऊत आणि आदित्य ठाकरे यांच्यावरही त्यांनी टीका केली. मृत व्यक्तीच्या प्रकरणाचा राजकीय फायदा घेण्याचा प्रयत्न केला जात असल्याचा आरोप त्यांनी केला.

आपल्या २० वर्षांच्या राजकीय कारकिर्दीत अशा प्रकारचा आरोप पहिल्यांदाच झाल्याचे मिनाक्षी शिंदे यांनी सांगितले. “वैचारिक मतभेद असू शकतात; मात्र कोणाचाही जीव घेण्याची परिस्थिती माझ्यावर कधीही आलेली नाही.” असे म्हणत त्यांनी आपल्यावरील आरोप फेटाळून लावले.

आदित्य ठाकरे, उद्धव ठाकरेंच्या नावाचा उल्लेख

दरम्यान, दिशा सालियन प्रकरणाचा संदर्भ देत मिनाक्षी शिंदे यांनी संजय राऊत यांना सवाल केला. “दिशा सालियन प्रकरणात आदित्य ठाकरे आणि उद्धव ठाकरे यांची नावं आली आहेत. मग त्यांनाही अटक करणार का?” असा प्रश्न त्यांनी उपस्थित केला.

दोन आरोपी अटकेत; फरार आरोपींचा शोध सुरू

प्रदीप पूर्णेकर हत्या प्रकरणात पोलिसांनी आणखी दोन आरोपींना अटक केली आहे. या प्रकरणात एकूण पाच जणांचा सहभाग असल्याची माहिती समोर आली असून, दोन आरोपी अद्याप फरार आहेत. फरार आरोपींचा शोध घेण्यासाठी पोलिसांकडून तपास सुरू आहे.

या प्रकरणामागील मुख्य सूत्रधार कोण, याचा शोधही पोलिस घेत आहेत. त्यामुळे तपासात पुढे कोणती माहिती समोर येते आणि राजकीय आरोप-प्रत्यारोपांना कोणते वळण मिळते, याकडे आता लक्ष लागले आहे

Sharad Pawar : आधी मुख्यमंत्र्यांना पत्र, आता शरद पवार थेट शेतकऱ्यांच्या बांधावर; ‘हे’ आश्वासन देत म्हणाले…