पुणेः गेल्या दोन दिवस पुणे शहरासह राज्यात कडाक्याची थंडी होती. हवेत प्रचंड प्रमाणात थंडावा निर्माण झाला होता. पण आज सकाळी पुणे शहरावर दाट धुक्क्यांची चादर पसरली होती. तसेच गेल्या काही दिवस गोठवणारी थंडी काहीशी नरम वाटत होती. हवेत हलक्या स्वरुपाचा थंडावा निर्माण झाला होता. आज सकाळी सहा ते सात या वेळेत पुणे शहर दाट धुक्क्यांच्या चादरित सामावलेले होते. राज्यात तीन दिवसात किमान तापमानात हळूहळू वाढ होण्याचा अंदाज हवामान विभागाकडून वर्तवण्यात आला आहे. कोकण, मध्य महाराष्ट्र आणि मराठवाड्यात हलक्या स्वरुपाच्या पावसाचा अंदाज व्यक्त करण्यात येत आहे. पुढील पाच दिवस किमान तापमानात दोन ते तीन अंशांनी वाढणार असल्याचे हवामान विभागाकडून सांगण्यात आले आहे.

पुणे शहरासह राज्यातील बहुतांश ठिकाणचे तापमान १० अंशांच्या खाली घसरले आहे. परिणामी पहाटे छत्रपती संभाजीनगर, जळगाव आणि परभणी येथे प्रचंड गारठ्यासह धुक्क्याची चादर दिसून येत आहे. दक्षिण-पूर्व इराण आणि आसपासच्या भागांमध्ये चक्राकार वाऱ्यांची स्थिती निर्माण झाली असून राजस्थानच्या दक्षिण-पश्चिम भागात कमी उंचीवर चक्राकार वारे वाहत आहेत. यामुळे पश्चिम आणि पूर्वेकडील वाऱ्यांचा समन्वय होण्याचा अंदाज हवामान विभागाने वर्तवला आहे. महाराष्ट्रातही याचा परिणाम जाणवणार असून वातावरणातील गारठा कमी होणार आहे, तर किमान तापमानात तीन अंशांची वाढ होणार आहे.