सत्तार यांनी खासदार सुळेंची माफी मागावी – महादेव कोंढरे ः घोटावडे फाटा येथे राष्ट्रवादीचे आंदोलन
कृषिमंत्री अब्दुल सत्तार यांनी खासदार सुप्रिया सुळे यांच्याबद्दल केलेल्या बेताल वक्‍तव्याचे पडसाद पुणे जिल्ह्यात उमटले आहेत. या वक्‍तव्याच्या निषेधार्थ बारामती, दौंड, पुरंदर, भोर, मुळशी तसेच खेड, जुन्नर तालुक्‍यात मोठ्या प्रमाणात निषेध आंदोलन करण्यात आले. यावेळी राष्ट्रवादी कॉंग्रेसच्या कार्यकर्त्यांकडून सत्तार यांच्या विरोधात घोषणाबाजी करत कृषिमंत्र्यांच्या राजीनामा घेत कारवाई करण्याची मागणी करण्यात आली आहे.

पिरंगुट  – सध्याचे सरकार हे ईडीचे असून केंद्र शासनाच्या आशीर्वादाने निर्माण झाले आहे. राज्यात शेतकऱ्यांचे अनेक प्रश्‍न प्रलंबित असताना कृषिमंत्री अब्दुल सत्तार हे केवळ प्रसिद्धीसाठी वाचाळपणे बोलत आहे. अब्दुल सत्तार यांनी सुप्रिया सुळे यांचे नाव घेऊन जाहीर माफी मागावी. अन्यथा त्यांना मुळशीत फिरू देणार नाही, असा इशारा मुळशी तालुका राष्ट्रवादी कॉंग्रेसचे अध्यक्ष महादेव कोंढरे यांनी दिला.

घोटावडेफाटा (ता. मुळशी) येथे कृषिमंत्री अब्दुल सत्तार यांनी सिल्लोड येथे खासदार सुप्रिया सुळे यांच्याविषयी आक्षेपार्ह विधान केले. त्याच्या निषेधार्थ मुळशी तालुका राष्ट्रवादी कॉंग्रेसच्या वतीने निषेध आंदोलन करण्यात आले. त्यावेळी महादेव कोंढरे बोलत होते. यानिमित्त अब्दुल सत्तार यांच्या प्रतिमेला जोडे मारो आंदोलन करण्यात आले.

या वेळी राजाभाऊ हगवणे, दगडूकाका करंजावणे, शांताराम इंगवले, रवींद्र कंधारे, विजय केदारी, नंदू भोईर, चांगदेव पवळे, बाबाजी शेळके, सुनील वाडकर, सागर साखरे, अंकुश मोरे, राहुल पवळे, निलेश पाडाळे, जितेंद्र इंगवले, प्रशांत रानवडे, योगेश ठोंबरे, विलास अमराळे, प्रसन्न ओझरकर, राधिका कोंढरे, कोमल वाशिवले, उज्वला पिंगळे, अस्मिता मारणे, नेहा साठे, अंजली केदारी, महादेव गोळे, भाऊ केदारी, भानुदास गोळे, राजेंद्र मारणे, माऊली कांबळे, भरत मारणे, रवींद्र गोळे, लक्ष्मण निकटे, शशिकांत मोरे, सागर धुमाळ, बाळासाहेब झोरे, संतोष पवळे, सचिन पवळे, चंद्रकांत निकटे, विजय मारणे, सुभाष मारणे, कैलास वाघ व कार्यकर्ते उपस्थित होते.

अब्दुल सत्तार यांनी यापुढे महिलांविषयी आक्षेपार्ह विधान केल्यास त्यांना त्यांची जागा दाखवून देऊ. सत्तार मुळशीत आल्यावर त्यांना जोडे मारण्यात येतील, असा इशारा माजी सभापती राधिका कोंढरे व माजी सभापती कोमल वाशिवले यांनी दिला.