नवी दिल्ली : दिल्लीचे मुख्यमंत्री अरविंद केजरीवाल यांनी जामीन मिळण्यासाठी याचिका दाखल केली. त्यावर दिल्ली उच्च न्यायालयात शुक्रवारी (५ जुलै) सुनावणी होईल. दिल्ली मद्य धोरण घोटाळ्याशी संबंधित मनी लॉण्डरिंग प्रकरणी ईडीने याआधीच केजरीवाल यांना अटक केली. त्यानंतर त्या घोटाळ्याशी संबंधित भ्रष्टाचार प्रकरणी सीबीआयने नुकतीच केजरीवाल यांना औपचारिकरित्या अटक केली. आता सीबीआय प्रकरणी जामीन मिळावा यासाठी त्यांनी उच्च न्यायालयाचा दरवाजा ठोठावला आहे. कायद्याच्या योग्य प्रक्रियेचा वापर न करता सीबीआयने अवैधरित्या ताब्यात घेतल्याची भूमिका त्यांनी याचिकेतून मांडली आहे. केजरीवाल यांनी याआधीच स्वतंत्र याचिकेद्वारे सीबीआयने केलेल्या अटकेला आव्हान दिले आहे. दरम्यान, दिल्लीतील स्थानिक न्यायालयाने मनी लॉण्डरिंग प्रकरणी केजरीवाल यांची न्यायालयीन कोठडी १२ जुलैपर्यंत वाढवली.
