दिल्ली : दिवाळीच्या सणादिवशी दिल्लीतील डॉ. दिशंबर दास मार्गावरील ब्रह्मपुत्रा अपार्टमेंट्स या इमारतीला आग लागल्याची धक्कादायक घटना घडली. ही इमारत संसद भवनापासून अवघ्या २०० मीटर अंतरावर असून, याच परिसरात राज्यसभा आणि लोकसभा खासदारांचे निवासस्थान आहे. या संवेदनशील परिसरातील आगीच्या घटनेने सुरक्षा यंत्रणांमध्ये प्रचंड खळबळ उडाली आहे. दुपारी साडेबारा ते दीडच्या सुमारास आग लागल्याची माहिती अग्निशमन दलाला मिळाली. माहिती मिळताच अग्निशमन दलाचे जवान तातडीने घटनास्थळी दाखल झाले आणि आगीवर नियंत्रण मिळवण्यासाठी शर्थीचे प्रयत्न सुरू केले. मात्र, आगीचे नेमके कारण अद्याप स्पष्ट झालेले नाही. अग्निशमन दलाने वेळेत प्रतिसाद न दिल्याने नुकसान अधिक झाल्याचा आरोप इमारतीतील रहिवाशांनी केला आहे. “जर अग्निशमन दलाचे जवान वेळेत पोहोचले असते, तर नुकसान कमी झाले असते,” असे काही रहिवाशांचे म्हणणे आहे. सोशल मीडियावर या घटनेचे फोटो आणि व्हिडीओ व्हायरल होत आहेत, ज्यात पोलिस इमारतीतून लोकांना सुरक्षितपणे बाहेर काढताना दिसत आहे. आग लागल्याने घाबरलेल्या अवस्थेत अनेक रहिवासी इमारतीबाहेर उभे असल्याचे दृश्य दिसून आले. हा परिसर अत्यंत संवेदनशील असल्याने, आग विझवण्याचे प्रयत्न आणि रहिवाशांच्या सुरक्षिततेची खबरदारी घेण्यासाठी प्रशासनाने तातडीने पावले उचलली. सध्या अग्निशमन दल आगीवर नियंत्रण मिळवण्यासाठी अथक प्रयत्न करत आहे. या घटनेची चौकशी सुरू असून, आगीचे कारण आणि नुकसानीचा अंदाज लवकरच स्पष्ट होण्याची शक्यता आहे.
