देहूगाव – ‘दसरा दिवाळी तोचि माझा सण। सखे हरिजन भेटतील॥’ या जगद्गुरू संत तुकाराम महाराजांच्या अभंगवाणीचा प्रत्यय विजयादशमीच्या निमित्ताने श्रीक्षेत्र देहू येथे आला. जगद्गुरू श्री संत तुकाराम महाराज संस्थानच्या वतीने संत तुकाराम महाराजांच्या पालखीचा पारंपरिक सीमोल्लंघन सोहळा भक्तिमय वातावरणात उत्साहाने पार पडला.

टाळ-मृदंगाचा निनाद, अभंगांचे स्वर आणि ‘ज्ञानोबा माऊली, तुकाराम’च्या जयघोषाने अवघा परिसर दुमदुमून गेला.विजयादशमीच्या मंगलपर्वावर संस्थानच्या वतीने संत तुकाराम महाराजांची पालखी विठ्ठलवाडी येथील विठ्ठल मंदिराकडे नेण्यात आली.

या वेळी वारकरी भक्तिभावाने सहभागी झाले होते. भगव्या पताका, हरिनामाचा गजर आणि टाळ-मृदंगाच्या तालावर रंगलेल्या भक्तिमय वातावरणाने देहूनगरीत उत्सवाचा रंग अधिकच खुलला.

विठ्ठल मंदिराजवळ पालखी पोहोचल्यानंतर वारकऱ्यांनी परंपरेनुसार एकमेकांची गळाभेट घेतली. आपट्याची पाने आणि नारळ देत परस्परांना दसऱ्याच्या शुभेच्छा देण्यात आल्या. प्रेम, आपुलकी आणि बंधुभाव जपणाऱ्या या परंपरेतून वारकरी संप्रदायातील सामाजिक एकात्मतेचे दर्शन घडले. सीमोल्लंघनाचा विधी पूर्ण झाल्यानंतर संत तुकाराम महाराजांची पालखी पुन्हा मुख्य मंदिरात आणण्यात आली.

सीमोल्लंघनातून समतेचा संदेश

हिंदू धर्मात विजयादशमीला सीमोल्लंघन करण्याची प्राचीन परंपरा आहे. पूर्वी राजे-महाराजे विजयप्राप्तीसाठी राज्याच्या सीमा ओलांडत असत. वारकरी संप्रदायाने मात्र या परंपरेला भक्ती, समता आणि माणुसकीची जोड दिली आहे. मनातील अहंकार, द्वेष आणि भेदभावाच्या सीमा ओलांडून प्रत्येकाने एकमेकांशी प्रेमाने वागावे, हा या सोहळ्याचा व्यापक संदेश आहे.

‘दसरा दिवाळी तोचि माझा सण। सखे हरिजन भेटतील॥’ या अभंगातून संत तुकाराम महाराजांनी माणसांच्या भेटीतून मिळणारा आनंद हाच खऱ्या सणाचा गाभा असल्याचे सांगितले आहे. देहूतील सीमोल्लंघन सोहळ्याने संतविचारांची महती अधोरेखित करत वारकरी परंपरेतील समता, बंधुभाव आणि सामाजिक एकात्मतेचा संदेश पुन्हा एकदा दिला.

Indapur : कर्मयोगीच्या निवडणुकीत पात्र उमेदवारांची यादी जाहीर