पुणे : येरवड्यातील बाॅम्बे इंजिनिअर्स ग्रुप (बीईजी) मैदानावर आयोजित करण्यात आलेल्या सेना दिन संचलन कार्यक्रमास संरक्षण मंत्री राजनाथ सिंह बुधवारी (१५ जानेवारी) उपस्थित राहणार आहेत. येरवडा भागातील चंद्रमा चौक, होळकर पूल दरम्यान सकाळी सात ते अकरा दरम्यान वाहतूक बदल करण्यात येणार आहेत.

आळंदी रस्ता चौक ते चंद्रमा चौक, चंद्रमा चौक ते होळकर पूल दरम्यान दुतर्फा सर्व प्रकारची वाहने लावण्यास बंदी घालण्यात आली आहे. खडकीतील हॅरिस पूल, नगर रस्त्यावरील खराडी बाह्यळण मार्ग, शास्त्रीनगर चौक, शादलबाबा चौक, विश्रांतवाडी चौकातून येरवड्याकडे जाणाऱ्या जड वाहनांना सकाळी सहा ते रात्री अकरापर्यंत बंदी घालण्यात आली आहे. वाहनचालकांनी मार्गांचा वापर करावा, असे आवाहन वाहतूक शाखेचे पोलीस उपायुक्त अमोल झेंडे यांनी केले आहे.

येरवड्यातील शादलबाबा चौक ते चंद्रमा चौकमार्गे खडकीकडे जाणारी वाहतूक बंद ठेवण्यात येणार आहे. वाहनचालकांनी शादलबाबा चौक, डाॅ. आंबेडकर चौक, आळंदी चौक, विश्रांतवाडीतील साप्रस पोलीस चौकी, जुना होळकर पूलमार्गे इच्छितस्थळी जावे.

विश्रांतवाडीकडून होळकर पूलमार्गे खडकीकडे जाणारी वाहतूक बंद ठेवण्यात येणार आहे. विश्रांतवाडी, साप्रस पोलीस चौकीमार्गे, जुना होळकर पूलमार्गे वाहनचालकांनी इच्छितस्थळी जावे. बोपोडी चैाक, खडकी बाजार, चर्च चौक दरम्यान होळकर पूल, येरवड्याकडे जाणारी वाहतूक बंद ठेवण्यात येणार आहे. वाहनचालकांनी पाटील इस्टेट, वाकडेवाडीमार्गे इच्छितस्थळी जावे. जुन्या मुंबई-पुणे रस्त्यावरुन अंडी उबवणी केंद्र (पोल्ट्री चौक) परिसरातील भुयारी मार्गातून मुळा रस्तामार्गे खडकी बाजारकडे जाणारी वाहतूक बंद ठेवण्यात येणार आहे.