Sushma Andhare |  शिवसेना उद्धव बाळासाहेब ठाकरे पक्षाच्या नेत्या सुषमा अंधारे आपल्या परखड भाषणांमुळे चर्चेत असतात. विविध मुद्यांवर भाष्य करत त्या सरकावर निशाणा साधतात. मात्र आता थेट सुषमा अंधारे यांना जीवे मारण्याची धमकी देण्यात आल्याचा प्रकार समोर आला आहे. याबाबत सोशल मीडियावर एक पोस्ट शेअर करत त्यांनी माहिती दिली आहे. तसेच सुषमा अंधारे यांनी मुख्यमंत्री देवेंद्र फडणवीस यांना या प्रकरणाची चौकशी करण्याची विनंती केली आहे.

नागपूर विमानतळावर एका व्यक्तीने धमकी दिल्याचा उल्लेख सुषमा अंधारे यांनी फेसबुक पोस्टमध्ये केला आहे. त्यांची सात वर्षांची लेकसोबत असताना हा प्रकार झाल्याने याची माहिती त्यांनी फेसबुक पोस्टद्वारे दिली आहे.

सुषमा अंधारे यांची फेसबुक पोस्ट 

“परभणी प्रकरणातील दोषी पोलीस अधिकाऱ्यांवर कारवाई व्हावी यासाठी सभागृहात आणि बाहेर संघर्ष चालु आहे. अशातच आत्ता 3 वाजून 36 मिनिटांनी नागपूर विमानतळावर departure gate ला विचित्र घटना घडली. मी, माझी ७ वर्षांची लेक आणि समता सैनिक दलाच्या ऍड. स्मिता कांबळे यांच्या समवेत होते. साधारण ६ फूट उंचीचा गोल आकाराचा गंध लावलेला, समोरून अर्धे टक्कल असणारा माणूस बोलण्याचा प्रयत्न करत होता. नेहमी प्रमाणे कुणीतरी ओळखीचा असावा म्हणुन वर बघितले तर तो जिवे मारण्याच्या धमक्या देत होता. गेट वरील सुरक्षा रक्षक थोडे पुढे सरसावले तसा तो ‘जय श्रीराम’च्या घोषणा देत भरधाव गाडीने निघून गेला,” असा आरोप सुषमा अंधारे यांनी केला आहे.

“देवेंद्र जी ,आपण आपल्या यंत्रणेकडून या ठिकाणचे सर्व सीसीटीव्ही तपासून वस्तुस्थिती तपासावी. हा घटनाक्रम इथे लिहू नये असे खुपदा वाटले. मात्र दहशत आणि दबावतंत्राचे हे गलिच्छ राजकरण मुख्यमंत्री म्हणून आपल्यापर्यंत पोचवणे ही नागरिक म्हणून माझी जबाबदारी आहे असे वाटले. टीप शासनाने मला सुरक्षा पुरवावी असे अजिबात वाटत नाही. कारण त्यावर माझा फारसा विश्वास नाही. बाकी आपली मर्जी,” असेही म्हणत सुषमा अंधारेंनी शासन सुरक्षा व्यवस्थेवरही प्रश्नचिन्ह उपस्थित केले आहे.

हेही वाचा: 

मोठी बातमी ! छगन भुजबळांची राज्यपालपदी वर्णी लागणार? भाजप आमदाराचा दावा