मुंबई : राज्य सरकारची महत्त्वकांक्षी मुख्यमंत्री माझी लाडकी बहीण योजनेतील लाभार्थ्यांसाठी अतिशय महत्त्वाची बातमी समोर आली आहे. लाडकी बहीण योजनेचा एप्रिल महिन्याच्या हप्त्यासंदर्भात मोठी अपडेट समोर आली आहे. फेब्रुवारी आणि मार्च या दोन महिन्यांचा हप्ता ८ मार्च रोजी खात्यात जमा झाला होता. आता मात्र एप्रिलच्या हप्त्यासाठी लाडक्या बहिणींना वाट पाहावी लागणार आहे.

याबाबत मिळालेल्या माहितीनुसार, आता एप्रिल महिन्याचा लाडकी बहीण योजनेचा हप्ता अक्षय्य तृतीयेच्या मुहुर्तावर मिळणार आहे. महिन्याच्या शेवटी लाडकी बहीण योजनेचा हप्ता लाभार्थ्यांच्या खात्यावर जमा होणार आहे. ज्या महिलांना मार्च महिन्याचा हप्ता आला नाही, त्यांना एप्रिलच्या हप्त्यांमध्ये पैसे येण्याची शक्यता आहे.

 अक्षय्य तृतीयेच्या मुहूर्तावर पैसे येणार?

सर्व पात्र महिलांच्या खात्यात अक्षय्य तृतीयेच्या मुहूर्तावर पैसे येणार असल्याची माहिती मिळत आहे. विशेष म्हणजे यंदा लाभार्थ्यांची संख्या घटणार की वाढणार? असा सवाल उपस्थित होत आहे. कारण मागील हप्त्यात लाभार्थ्यांची संख्या काही प्रमाणात वाढली होती. यंदा किती लाभार्थ्यांच्या खात्यात रक्कम जमा होणार? हे पाहणे महत्त्वाचे ठरणार आहे.

जानेवारीपासून लाडकी बहीण योजनेत ज्या महिला पात्र ठरल्या होत्या, त्यांची पडताळणी करण्यात येत आहे. त्यासाठी राज्य सरकारने निकष ही लावले आहे. या योजनेचा गैरफायदा अनेक महिलांनी घेतल्याच्या तक्रारी सरकारकडे आल्या होत्या. त्यानंतर आता पडताळणी केली जात आहे.

याबाबत महिला व बाल कल्याण मंत्री आदिती तटकरे यांनी काही दिवसांपूर्वी ‘एक्स’वर पोस्ट करत म्हटले होते की, ही योजना २१ ते ६५ वयोगटातील महिलांसाठी लागू आहे, त्यामुळे ६५ वर्षे पूर्ण करणाऱ्या महिलांचा लाभ दर महिन्याला बंद होतो. यामुळे लाभार्थ्यांची संख्या नियमितपणे बदलत असते. या योजनेसाठी अर्ज केलेल्या एकूण महिलांपैकी जवळपास ११ लाख महिलांचे अर्ज अपात्र ठरवण्यात आले आहेत.

लाडक्या बहिणींना आत्तापर्यंत किती पैसे मिळाले

मुख्यमंत्री लाडकी बहीण योजनेच्या अंतर्गत आतापर्यंत एकूण नऊ हप्त्यांचे एकूण १३,५०० रुपये (जुलै, ऑगस्ट, सप्टेंबर, ऑक्टोबर, नोव्हेंबर, डिसेंबर, जानेवारी, फेब्रुवारी, मार्च) लाडक्या बहिणींच्या बँक खात्यात जमा झाले आहेत. लाडकी बहीण योजनेचा १०वा हप्ता एप्रिल महिन्यात मिळणार आहे.