मुंबई : राज्यातील विधानसभा निवडणुकीमध्ये महायुतीला मोठ्या प्रमाणात यश मिळाले. त्यात 132 जागांसह भाजप राज्यातील सर्वात मोठा पक्ष ठरला. त्यामुळे मुख्यमंत्रीपद भाजपकडे जाणार होते. यानंतर भाजपचे देवेंद्र फडणवीस हेच मुख्यमंत्रीपदाची शपथ घेणार असं ठरल्यानंतर माजी मुख्यमंत्री व शिवसेना नेते एकनाथ शिंदे मोठ्या प्रमाणात नाराज झाल्याचे पाहायला मिळाले. या संदर्भात मंत्री गुलाबराव पाटील यांनी एकनाथ शिंदेंबाबत मोठा खुलासा केला आहे.

काय म्हणाले गुलाबराव पाटील?
एकनाथ शिंदे यांनी उपमुख्यमंत्री होण्यासाठी नकार दिला, त्यावेळेस टीव्हीवर बातम्या चालत होत्या. आम्ही त्यांना विनंती केली की आपण सत्तेमध्ये असलं पाहिजे. कारण, एकनाथ शिंदे या नावाने सध्याचं महायुती सरकार येण्यामध्ये फार मोठी ताकद होती. त्यामुळेच, तुम्ही सरकारमध्ये असलं पाहिजे, देवेंद्र फडणवीस हे आपल्या काळात उपमुख्यमंत्री होते, त्यांनीदेखील मोठे मन दाखवलं होतं.

आपण सुद्धा यावेळेस मोठे मन दाखवलं पाहिजे आणि उपमुख्यमंत्री पद घेतलं पाहिजे, अशी विनंती आपण एकनाथ शिंदेंना केली होती. आपल्या सर्व आमदारांचा एकनाथ शिंदे यांनी मान ठेवला, असा खुलासाच गुलाबराव पाटील यांनी केला. त्यामुळे, आपण नाराज नाही असं म्हणणारे एकनाथ शिंदे हे नाराज होते हेही स्पष्ट झाले.

तीनवेळा पालकमंत्रीपदाची संधी मिळणारा मी एकमेव
एकनाथ शिंदे यांनी माझ्यावरती विश्वास ठेवला आणि मला तिसऱ्यांदा मंत्रिपदाची संधी मिळाली. उद्धव ठाकरे यांच्या सरकारमध्येही पाणीपुरवठा आणि शिंदे साहेबांच्या सरकारमध्येही पाणीपुरवठा खाते माझ्याकड़े होते. आता, देवेंद्र फडणवीस यांच्या सरकारमध्येही पाणीपुरवठा अशी संधी मिळणारा मी पहिला मंत्री असेल, असे गुलाबराव पाटील यांनी म्हटले.