इस्लामाबाद- अंडरवर्ल्ड डॉन दाऊद पाकिस्तानातच असल्याबद्दल आंतरराष्ट्रीय पातळीवर पाकिस्तानची अनेकदा नाचक्की झाली आहे. तरीही, दाऊदच्या ठिकाण्याबद्दल पाकिस्तानने जाहीरपणे बोलणे टाळले होते. पण, आता भारताच्या दृष्टीने मोस्ट वॉन्टेड असलेला दाऊद आपल्या भूमीत राहत असल्याची कबुली पाकिस्तानने प्रथमच दिली आहे. त्यामुळे पाकिस्तानची लबाडी पुन्हा जगासमोर आली आहे.

दाऊदला आश्रय दिल्याविषयी पाकिस्तानकडून नेहमी नकारघंटा वाजवली जात होती. पण, आता आर्थिक निर्बंध लादण्याची नामुष्की ओढवलेल्या पाकिस्तानला दाऊदचा पत्ता उघड करावा लागला आहे.

त्यामुळे दाऊद पाकिस्तानच्या कराची शहरात राहत असल्याचे स्पष्ट झाले आहे. कराचीमध्ये त्याची तीन घरे असल्याचे पाकिस्तान सरकारने नमूद केले आहे. यावर आता आंतरराष्ट्रीय पातळीवरून काय हालचाली होतात, हे पाहणे महत्त्वाचे आहे.