नांदुर ( दौंड ) – दौड तहसील कार्यालयातून देण्यात येणाऱ्या दाखल्यांसाठी राबविली जाणारी ऑनलाइन प्रक्रिया प्रमाणीकरणाअभावी ठप्प झाली आहे. त्यामुळे अनेक चकरा मारूनही दाखले मिळत नसल्याने नागरिक त्रस्त झाले आहेत, तसेच अनेकांची कामे खोळंबली आहेत.

तहसील कार्यालयामार्फत शासनाच्या विविध योजनांसाठी, विद्यार्थ्यांना शैक्षणिक प्रवेशासाठी व सवलतीसाठी लागणारे दाखले दिले जातात. त्यासाठी लागणाऱ्या कागदपत्रांची पूर्तता व कार्यालयीन प्रक्रिया शासनाच्या सेतू सुविधा केंद्रामार्फत संबंधितांकडून पूर्ण करून घेतली जाते. ऑनलाइन पद्धतीने चालणाऱ्या या कामकाजासाठी नायब तहसीलदारांचा ठसा डिजिटल स्वाक्षरी म्हणून संगणकीय प्रणालीमध्ये वापरला जातो.

त्यामुळे अनेक महिन्यांपासून लाभार्थींचे ऑनलाइन दाखले व प्रमाणपत्रे रखडली आहेत. विद्यार्थ्यांना शैक्षणिक प्रवेशासाठी ऑनलाइन प्रमाणपत्रे आवश्यक असल्याने, त्यांच्या प्रवेशाचा तिढा निर्माण झाला आहे.

याबाबत तहसील कार्यालयात चौकशीसाठी गेलेल्या नागरिकांना उडवाउडवीची उत्तरे देऊन परत पाठविले जाते. ही प्रक्रिया कधी सुरू होईल, याबाबत माहिती नसल्याने अनेक लाभार्थींना अडचणींचा सामना करावा लागत आहे. या बाबत दौंड तहसिलदार अरूण शेलार यांना संपर्क केला असता संपर्क होऊ शकला नाही.

समोवारी (दि. 23 ऑक्टोबर) नागरिकांनी दाखले मिळावे म्हणून संबंधित अधिकारी यांना विचारपुस केली आसता अधिकाऱ्यांनी अरेरावीची भाषा वापरली, अशे नागरिकांनी सांगितले. जिल्हाअधिकारी यांनी या प्रकरणाबाबत योग्य ती दखल घेवून दौंडमधील सामान्य जनतेला काम करणारा अधिकारी द्यावा, अशी मागणी नागरिकांमधून होत आहे.