शिरूर :विद्यार्थ्यांमध्ये वैज्ञानिक दृष्टिकोन,संशोधन वृत्ती आणि सर्जनशीलतेला चालना देण्याच्या उद्देशाने आयोजित करण्यात आलेल्या ५३ व्या शिरूर तालुकास्तरीय बाल वैज्ञानिक विज्ञान प्रदर्शनात शिक्षक गटात जिल्हा परिषद प्राथमिक शाळा,उचाळे वस्ती येथील आदर्श शिक्षक दत्तात्रय अनंतराव चिकटे यांनी प्रथम क्रमांक पटकावला. विशेष म्हणजे त्यांनी सलग चौथ्या वर्षी प्रथम क्रमांकाचा मान मिळवत आपल्या गुणवत्तेची आणि सातत्याची ठसा उमटवला आहे.

पुणे जिल्हा शिक्षण मंडळाच्या वतीने १७ व १८ डिसेंबर २०२५ रोजी श्री भैरवनाथ विद्यालय, करडे येथे हे प्रदर्शन भरविण्यात आले होते. “विकसित आणि आत्मनिर्भर भारतासाठी” या संकल्पनेवर आधारित या विज्ञान प्रदर्शनात शाश्वत शेती, हरित ऊर्जा, उदयोन्मुख तंत्रज्ञान, कचरा व्यवस्थापन व प्लास्टिकला पर्याय, आरोग्य व स्वच्छता तसेच जलसंवर्धन यांसारख्या विषयांवर आधारित नावीन्यपूर्ण प्रकल्प सादर करण्यात आले.

शिक्षक गटात दत्तात्रय चिकटे यांनी सादर केलेल्या प्रकल्पाने सोप्या पद्धतीने वैज्ञानिक संकल्पना मांडणी, व्यवहार्य उपयोगिता आणि विद्यार्थ्यांमध्ये संशोधनाची गोडी निर्माण करणारा दृष्टिकोन यामुळे परीक्षकांचे विशेष लक्ष वेधून घेतले.अध्यापनातील नावीन्य, प्रयोगशीलता आणि सातत्यपूर्ण गुणवत्तेमुळे ते तालुक्यातील शिक्षकांसाठी प्रेरणास्थान ठरत आहेत.या यशाबद्दल शिरूर तालुक्याचे माजी आमदार काकासाहेब पलांडे,पंचायत समिती विस्तार अधिकारी किसन खोडदे,गटशिक्षणाधिकारी बाळकृष्ण कळमकर यांच्या हस्ते त्यांचा सत्कार करण्यात आला.यावेळी अध्यक्ष संभाजी ठुबे, मारुती कदम, माजी विद्यार्थी संघ अध्यक्ष शिवाजीराव वाळके आदी मान्यवर उपस्थित होते.

या प्रदर्शनात तालुक्यातील इयत्ता ६वी ते ८वी आणि इयत्ता ९वी ते १२वी अशा दोन विद्यार्थी गटांनी सहभाग घेतला असून, निवड झालेल्या प्रकल्पांना जिल्हास्तरीय विज्ञान प्रदर्शनात सहभागी होण्याची संधी मिळणार आहे.विद्यार्थ्यांमध्ये वैज्ञानिक दृष्टिकोन रुजवून भविष्यातील संशोधक व वैज्ञानिक घडविण्यासाठी हे व्यासपीठ अत्यंत महत्त्वाचे असल्याचे मत शिक्षण विस्तार अधिकारी किसन खोडदे यांनी व्यक्त केले.

टाकळी हाजी केंद्र प्रमुख महादेव बाजारे, शिरूर तालुका प्राथमिक शिक्षक सहकारी पतसंस्था संचालक प्रभाकर शेळके, शाळेचे मुख्याध्यापक बाळासाहेब दरेकर, सहशिक्षिका मंदा सोदक यांचे विशेष सहकार्य लाभले असे आदर्श शिक्षक दत्तात्रय चिकटे यांनी सांगितले.

शाळा व्यवस्थापन समिती अध्यक्ष विकास जायकर, उपाध्यक्ष विलास साबळे, संचालक तसेच अंगणवाडी सेविका संध्या बोखारे यांनी दत्तात्रय चिकटे यांचे अभिनंदन केले.

शिक्षण क्षेत्रात सातत्याने नवोपक्रम राबवून विद्यार्थ्यांच्या जडणघडणीत मोलाचे योगदान देणारे, प्रयोगशील अध्यापनाचे उत्तम उदाहरण ठरलेले शिक्षक म्हणून दत्तात्रय चिकटे यांची ही कामगिरी निश्चितच गौरवास्पद असून संपूर्ण शिरूर तालुक्यासाठी अभिमानास्पद ठरली आहे.