Mumbai Open WTA 125K Tennis Tournament :लात्वियाच्या सेमेनिस्तेजाने पटकावलं विजेतेपद..
मुंबई – महाराष्ट्र राज्य लॉन टेनिस संघटना (एमएसएलटीए) आणि क्रिकेट क्लब ऑफ इंडिया (सीसीआय) आयोजित एल अॅण्ड टी मुंबई ओपन डब्लूटीए १लाख २५हजार डॉलर टेनिस स्पर्धेत एकेरीत लात्वियाच्या दरजा सेमेनिस्तेजा हीने विजेतेपद संपादन केले.
क्रिकेट क्लब ऑफ इंडिया येथील टेनिस कोर्टवर पार पडलेल्या या स्पर्धेत एकेरीत अंतिम फेरीत चुरशीच्या लढतीत लात्वियाच्या सहाव्या मानांकित दरजा सेमेनिस्तेजा हीने ऑस्ट्रेलियाच्या स्टॉर्म हंटरचा ५-७, ७-६(६), ६-२ असा पराभव केला. हा सामना २तास ३०मिनिटे चालला. पहिल्या सेटमध्ये सुरुवातीला दोन्ही खेळाडूंनी आपापल्या सर्व्हिस राखल्या.
सामन्यात बरोबरी असताना स्टॉर्मने परतिचे सुरेख फटके लावत १२व्या गेममध्ये सर्व्हिस ब्रेक केली व हा सेट ७-५ असा जिंकून आघाडी घेतली. दुसऱ्या सेटमध्ये दोन्ही खेळाडूंनी जिगरबाज खेळाचे प्रदर्शन आपापल्या सर्व्हिस राखल्या व त्यामुळे सेट टायब्रेकमध्ये गेला. टायब्रेकमध्ये दरजाने वेगवान खेळ करत हा सेट ७-६(६) असा जिंकून सामन्यातील आपले आव्हान कायम राखले. तिसऱ्या व निर्णायक सेटमध्ये दरजाने आपला खेळ उंचावत स्टॉर्मची पाचव्या गेममध्ये सर्व्हिस भेदली व हा सेट ६-२ असा जिंकून विजेतेपदावर आपले नाव कोरले.
दरजा हीने याआधी मागील महिन्यात बेंगळुरू येथील ५०००० डॉलर आयटीएफ स्पर्धेत विजेतेपद पटकावले होते. तिचे या वर्षातील हे दुसरे विजेतेपद आहे. स्पर्धेतील विजेत्या दरजा सेमेनिस्तेजा हिला करंडक, १५००० डॉलर व १२५ डब्लूटीए गुण, तर उपविजेत्या स्टॉर्म हंटरला करंडक, ८००२ डॉलर, ८१ डब्लूटीए गुण अशी पारितोषिके देण्यात आली. स्पर्धेचे पारितोषिक वितरण चीफ पेट्रीयन अमृता फडणवीस,राज्याचे मुख्य सचिव असिम गुप्ता, संयोजन समितीचे सदस्य संजय खंदारे(आयएएस), प्रवीण दराडे(आयएएस), श्रीनाथ राव, इन्कम टॅक्सचे संचालक सतीश शर्मा, एमएसएलटीएचे चेअरमन प्रशांत सुतार, एमएसएलटीएचे मानद सचिव सुंदर अय्यर आणि चेरेलिन क्रीमर यांच्या हस्ते करण्यात आले.
