पुणे : श्रीमंत दगडूशेठ हलवाई सार्वजनिक गणपती ट्रस्ट आणि सुवर्णयुग तरुण मंडळ यांच्या वतीने पुण्यात आलेल्या वारकऱ्यांसाठी जय गणेश रुग्णसेवा अभियान अंतर्गत मोफत आरोग्य तपासणी शिबिराचे आयोजन करण्यात आले.

या शिबिरात तब्बल ११,७६४ वारकऱ्यांची मोफत आरोग्य तपासणी करण्यात आली. बुधवार पेठेतील जय गणेश प्रांगण येथे झालेल्या या शिबिराचे उद्घाटन ट्रस्टचे अध्यक्ष सुनील रासने, कोषाध्यक्ष महेश सूर्यवंशी, आमदार व सरचिटणीस हेमंत रासने, सहचिटणीस अमोल केदारी यांच्यासह इतर पदाधिकारी आणि कार्यकर्त्यांच्या उपस्थितीत झाले.

रुग्णसेवा हीच ईश्वरसेवा या ब्रीदवाक्यानुसार आयोजित शिबिरात वारकऱ्यांच्या डोळ्यांची तपासणी, चष्मे वाटप, अंगदुखी, डोकेदुखी, बीपी, शुगर यांसारख्या आजारांची तपासणी आणि मोफत औषध वितरण करण्यात आले.

याशिवाय, फिजिओथेरपी सेवाही उपलब्ध करून देण्यात आली. शिबिरात २५ रुग्णालयांतील ३७५ डॉक्टर आणि अनेक स्वयंसेवकांनी सहभाग घेतला. सकाळी १५ हजार वारकऱ्यांना चहा, नाश्ता आणि पाणी वितरित करण्यात आले, तर पालख्यांच्या आगमनावेळी मंदिरासमोर पुष्पवृष्टी करून स्वागत करण्यात आले.

वारकऱ्यांसाठी सर्वंकष सेवा

या शिबिरात प्रवासादरम्यान वारकऱ्यांना येणाऱ्या आरोग्यविषयक समस्यांवर उपचार करण्यात आले. ट्रस्टच्या या सामाजिक उपक्रमाचे वारकऱ्यांनी आणि स्थानिकांनी कौतुक केले आहे.