Cyclone Arnab : बंगालच्या उपसागरात तयार झालेले ‘अर्नब’ चक्रीवादळ आता आंध्र प्रदेशच्या किनाऱ्याकडे वेगाने सरकत आहे. २८ ऑक्टोबरच्या सकाळी आंध्र प्रदेशच्या किनाऱ्यावर या चक्रीवादळाचा तडाखा बसण्याची शक्यता आहे. चक्रीवादळामुळे मुसळधार पाऊस आणि ताशी १४० किलोमीटर वेगाने वारे वाहण्याचा अंदाज हवामान विभागाने व्यक्त केला आहे.

भारतीय हवामान विभागाच्या माहितीनुसार, सोमवारी सकाळी ‘अर्नब’ बंगालच्या उपसागराच्या मध्य आणि पश्चिम भागात होते. त्यावेळी ते विशाखापट्टणमपासून सुमारे ६५० किलोमीटर अंतरावर होते. चक्रीवादळ पश्चिम दिशेने ताशी १५ किलोमीटर वेगाने पुढे सरकत होते. त्याची तीव्रता वाढून सोमवारी रात्रीपर्यंत ते तीव्र चक्रीवादळात आणि मंगळवारी अतितीव्र चक्रीवादळात रूपांतरित होण्याची शक्यता व्यक्त करण्यात आली आहे.

आंध्र प्रदेश आणि यानम किनाऱ्यादरम्यान, बापटला आणि विशाखापट्टणमच्या आसपास चक्रीवादळ धडकण्याचा अंदाज आहे. यावेळी वाऱ्याचा वेग ताशी ११५ ते १२५ किलोमीटर राहू शकतो. वाऱ्याचे झोत ताशी १४० किलोमीटरपर्यंत पोहोचण्याची शक्यता आहे.

केंद्राकडून तयारीचा आढावा –

चक्रीवादळाच्या पार्श्वभूमीवर केंद्र सरकारने आपत्कालीन परिस्थितीचा सामना करण्यासाठी तयारी सुरू केली आहे. राष्ट्रीय संकट व्यवस्थापन समितीची बैठक घेऊन बचाव आणि मदतकार्याचा आढावा घेण्यात आला. आंध्र प्रदेश, ओडिशा, तेलंगणा, छत्तीसगड आणि पुद्दुचेरीला सतर्क राहण्याच्या सूचना देण्यात आल्या आहेत.

एनडीआरएफ आणि एसडीआरएफची पथके तैनात करण्यात आली असून, अतिरिक्त पथकेही तयार ठेवण्यात आली आहेत. लष्कर, नौदल, हवाई दल आणि तटरक्षक दलाची बचाव पथकेही सज्ज ठेवण्यात आली आहेत. वीज, पाणी आणि इतर अत्यावश्यक सेवा खंडित झाल्यास त्या लवकर सुरू करण्याच्या सूचना देण्यात आल्या आहेत.

मच्छीमारांना समुद्रात न जाण्याचा इशारा

चक्रीवादळामुळे समुद्रात मोठ्या लाटा आणि जोरदार वारे निर्माण होण्याची शक्यता आहे. त्यामुळे मच्छीमारांना २६ ते २९ ऑक्टोबरदरम्यान समुद्रात न जाण्याचा सल्ला देण्यात आला आहे. समुद्रात गेलेल्या बोटी परत बोलावण्यात आल्या आहेत.

आंध्र प्रदेशात किनारी भागातील नागरिकांना सतर्क करण्यात आले आहे. जिल्हानिहाय नियंत्रण कक्ष सुरू करण्यात आले असून, गरज पडल्यास नागरिकांना सुरक्षित ठिकाणी हलविण्याची तयारी करण्यात आली आहे. गर्भवती महिलांना वेळेपूर्वी रुग्णालयात दाखल करण्याचीही व्यवस्था करण्यात येत आहे.

ओडिशातील सहा जिल्ह्यांना धोका

ओडिशातील गंजाम, गजपती, रायगडा, मलकानगिरी, कोरापूट आणि नबरंगपूर हे सहा जिल्हे संवेदनशील मानण्यात आले आहेत. या भागांत एनडीआरएफ, ओडिशा आपत्ती जलद कृती दल, अग्निशमन दल आणि पोलिसांची पथके तैनात करण्यात आली आहेत.

या जिल्ह्यांमध्ये मच्छीमारीवर निर्बंध घालण्यात आले आहेत. खबरदारी म्हणून डोंगर, धबधबे आणि धरणांच्या परिसरात पर्यटकांना प्रवेश देण्यावरही निर्बंध घालण्यात आले आहेत.

पश्चिम बंगालसह अनेक राज्यांत पावसाचा अंदाज

चक्रीवादळाचा परिणाम केवळ आंध्र प्रदेश आणि ओडिशापुरता मर्यादित राहण्याची शक्यता नाही. पश्चिम बंगालमध्ये २८ ते ३० ऑक्टोबरदरम्यान काही भागांत मुसळधार पाऊस होण्याचा अंदाज आहे. दक्षिण २४ परगणा, पूर्व आणि पश्चिम मेदिनीपूर, झारग्राम, बांकुरा आणि पुरुलिया या जिल्ह्यांना पावसाचा फटका बसू शकतो.

दार्जिलिंग, कालिम्पोंग, अलीपूरद्वार आणि जलपाईगुडी भागातही २९ आणि ३० ऑक्टोबरला जोरदार पावसाची शक्यता आहे. दार्जिलिंगमध्ये भूस्खलनाचा धोका लक्षात घेऊन सावधगिरीचा इशारा देण्यात आला आहे.

तेलंगणा आणि छत्तीसगडच्या काही भागांत मुसळधार ते अतिमुसळधार पावसाचा अंदाज आहे. झारखंड, बिहार, पूर्व उत्तर प्रदेश, विदर्भ आणि पूर्व मध्य प्रदेशातही पाऊस होण्याची शक्यता हवामान विभागाने व्यक्त केली आहे.

‘अर्नब’ नाव कसे पडले?

‘अर्नब’ हे नाव बांगलादेशने सुचविले आहे. बंगालच्या उपसागर आणि अरबी समुद्रात निर्माण होणाऱ्या चक्रीवादळांना ठरावीक क्रमाने नावे दिली जातात. यामुळे वेगवेगळ्या वादळांची ओळख पटविणे आणि नागरिकांना हवामानाचा इशारा देणे सोपे होते. भारतासह बांगलादेश, पाकिस्तान, श्रीलंका आणि इतर देशांनी या नावांच्या यादीत योगदान दिले आहे.