World Cup 2023 India vs Sri Lanka Match :  आयसीसी एकदिवसीय विश्वचषकात भारताविरुद्धच्या सामन्यात श्रीलंकेचा कर्णधार कुसल मेंडिसने नाणेफेक जिंकून प्रथम गोलंदाजी करण्याचा निर्णय घेतला. भारताने प्लेइंग इलेव्हनमध्ये कोणताही बदल केला नाही. त्याचवेळी श्रीलंकेने धनंजय डी सिल्वाच्या जागी दुषण हेमंतला संघात संधी दिली.

कर्णधार रोहित शर्मा आणि शुभमन गिल यांनी भारतीय डावाची सुरुवात केली पण पहिल्याच षटकात दिलशान मदुशंकाने टीम इंडियाला मोठा धक्का दिला. पहिल्या षटकाच्या दुसऱ्या चेंडूवर रोहित शर्मा पॅव्हेलियनमध्ये परतला. यानंतर विराट कोहली क्रीझवर आला, ज्याने झटपट अर्धशतक झळकावले. विराट कोहली 94 चेंडूत 88 धावा करून बाद झाला.

कोहलीने श्रीलंकेविरुध्दच्या सामन्यात 34 धावा करताच यावर्षी एकदिवसीय क्रिकेटमध्ये 1000 धावा पूर्ण करण्याचा विक्रम केला. 2023 मध्ये 1000 धावा पूर्ण करणारा कोहली हा चौथा फलंदाज ठरला आहे. यासह तो सचिन तेंडुलकरच्या पुढे गेला आहे. वास्तविक, सचिन तेंडुलकरच्या नावावर एका कॅलेंडर वर्षात सर्वाधिक 7 वेळा 1000 वनडे धावा करण्याचा विक्रम होता, जो विराट कोहलीने मोडला आहे.

एका कॅलेंडर वर्षात सर्वाधिक वेळा 1000+ एकदिवसीय धावा

8 वेळा – विराट कोहली (2011-14, 2017-19, 2023)*
7 वेळा – सचिन तेंडुलकर (1994, 1996-98, 2000, 2003, 2007)

2023 मध्ये सर्वाधिक एकदिवसीय धावा

शुभमन गिल- 1365
पथुम निस्संका- 1108
रोहित शर्मा- 1060*
विराट कोहली- 1054*
डॅरिल मिशेल- 998

आशियातील सर्वात जलद 8000 एकदिवसीय धावा पूर्ण करणारा खेळाडू

159 डाव – विराट कोहली*
188 डाव – सचिन तेंडुलकर
213 डाव – कुमार संगकारा
254 डाव – सनथ जयसूर्या

एकदिवसीय विश्वचषकातील सर्वोच्च 50+ धावा

21 – सचिन तेंडुलकर (44 डाव)
13 – विराट कोहली (33 डाव)*
12 – कुमार संगकारा (35 डाव)
12 – शकिब अल हसन (35 डाव)
12 – रोहित शर्मा (24 डाव)

विराट कोहली विश्वचषकातील श्रीलंकेविरुद्धच्या सामन्यात शतक झळकावण्यात अयशस्वी ठरला. विराट कोहली 94 चेंडूत 88 धावा करून बाद झाला.   त्यामुळे आजही  तो वनडे क्रिकेटमध्ये सर्वाधिक शतके झळकावण्याच्या बाबतीत सचिन तेंडुलकरशी बरोबरी करू शकला नाही. सचिनच्या नावावर 49 वनडे शतके आहेत. कोहलीने आतापर्यंत 48 शतके झळकावली आहेत.