World Cup 2023 #INDvPAK Match : भारत आणि पाकिस्तान यांच्यातील विश्वचषक सामन्यात विराट कोहलीला सामना सुरू होताच मैदान सोडावे लागले. कोहली चुकीची जर्सी घालून मैदानात आला होता आणि राष्ट्रगीतादरम्यान त्याची जर्सी बाकीच्या खेळाडूंपेक्षा वेगळी होती. मात्र, नंतर कोहलीला आपली चूक लक्षात आली आणि तो मैदानाबाहेर गेला. विराट परतला तेव्हा त्याने अचूक विश्वचषक जर्सी घातली होती.

जाणून घ्या,नेमकं काय झालं…?

भारत-पाकिस्तान सामना सुरू होण्यापूर्वी नियमानुसार दोन्ही देशांचे खेळाडू मैदानात उभे राहिले आणि दोन्ही संघांचे राष्ट्रगीत वाजवण्यात आले. यावेळी विराट कोहलीची जर्सी टीम इंडियाच्या इतर खेळाडूंपेक्षा वेगळी असल्याचे दिसून आले. कोहलीच्या जर्सीच्या खांद्यावर फक्त तीन पांढरे पट्टे होते. त्याच वेळी, इतर खेळाडूंच्या जर्सीवर खांद्याजवळ तिरंग्याचे पट्टे होते. यामध्ये पांढरा, हिरवा आणि भगवा रंगांचा समावेश होता. सर्व खेळाडूंच्या जर्सीवर वर्ल्ड कपचा लोगोही होता आणि हीच एकदिवसीय विश्वचषक 2023साठीची भारतीय संघाची अधिकृत जर्सी आहे.

नाणेफेकीनंतर काही वेळाने कोहलीला चुकीची जर्सी घालून मैदानात आल्याचे समजले. अशा परिस्थितीत विराट मैदानाबाहेर गेला आणि जेव्हा तो परतला तेव्हा त्याने योग्य जर्सी घातली होती, ज्यावर तिरंग्याचे पट्टे आणि वर्ल्ड कपचा लोगोही होता.

खेळ सुरू होण्यापूर्वी विराट कोहलीने सचिन तेंडुलकरची भेट घेतली. या भेटीचे फोटो व्हायरल होत आहेत. यावेळीही कोहलीने चुकीची जर्सी घातली होती. यानंतर विराटने या शानदार सामन्याचा आनंद लुटला. तसेच तो मस्करीच्या मूडमध्ये असल्याचे दिसून आले. मोहम्मद रिझवान फलंदाजीला आला आणि पहिल्या चेंडूला सामोरे जाण्यासाठी तो खूप वेळ घेत होता, तेव्हा विराटने घड्याळाकडे बोट दाखवत रिझवानची खिल्ली उडवली.