World Cup 2023 India vs Netherlands Match Live Score :  विश्वचषक 2023 च्या 45व्या सामन्यात आज भारताचा सामना नेदरलँडशी होत आहे. बंगळुरूच्या चिन्नास्वामी स्टेडियमवर हा सामना खेळला जात आहे. या विश्वचषकात आतापर्यंत अपराजित राहिलेल्या भारतीय संघाला नेदरलँडविरुद्धच्या अखेरच्या साखळी सामन्यात ही विजयी मोहीम कायम राखत देशवासीयांना दिवाळीची भेट द्यायची आहे.  भारतीय संघ उपांत्य फेरीत पोहोचला आहे तर नेदरलँड्स (IND vs NED) स्पर्धेतून बाहेर पडला आहे आणि हा त्यांचा शेवटचा सामना आहे.

IND vs NED Live : विराट कोहली बाद…

भारतीय संघानं 28.4 षटकात 200 धावांवर तिसरी आणि महत्वाची विकेट गमावली. विराट कोहली 56 चेंडूत 51 धावा करून बाद झाला. विराट कोहलीला व्हॅन डर मर्वेने क्लीनबोल्ड केले. त्याने आपल्या खेळीत पाच चौकार आणि एक षटकार मारला. आता लोकेश राहुल श्रेयस अय्यरसोबत क्रीजवर आहे. 30 षटकांनंतर भारताची धावसंख्या 211/3 आहे.

IND vs NED Live : विराट कोहलीचं शानदार अर्धशतक…

सलामीवीर शुभमन गिल आणि कर्णधार रोहित शर्मानंतर सामन्यात भारताचा स्टार फलंदाज विराट कोहलीनं देखील अर्धशतक झळकावले आहे. कोहलीनं 53 चेंडूत 5 चौकार अन् 1 षटकारासह आपलं 71 वं अर्धशतक पूर्ण केलं.

IND vs NED Live: रोहित शर्मा बाद…

भारताला 17.4 षटकात 129 धावांवर दुसरा धक्का बसला. रोहित शर्मा 54 चेंडूंत आठ चौकार आणि दोन षटकारांच्या मदतीने 61 धावा करून बाद झाला. रोहितला बास डी लीडेने बरेसीकरवी झेलबाद केले. तत्पूर्वी, शुभमन गिल 51 धावा करून बाद झाला.

IND vs NED Live : भारताला पहिला धक्का..

नेदरलँड्सविरूध्द 11.5 षटकात 100 धावसंख्येवर भारतानं पहिली विकेट गमावली. शुभमन गिल 32 चेंडूत 51 धावा करून बाद झाला. वन मीकरेनने गिलला निदामनुरुकरवी झेलबाद केले. गिलने आपल्या खेळीत तीन चौकार आणि चार षटकार मारले. शुभमन गिलने 30 चेंडूत आपले 12 वे अर्धशतक पूर्ण केले.

पॉवरप्लेमध्ये भारताच्या 91 धावा…

भारताने नाणेफेक जिंकल्यानंतर प्रथम फलंदाजी करताना आक्रमक सुरुवात केली. पॉवरप्लेमध्ये टीम इंडियाने एकही विकेट न गमावता 91 धावा केल्या होत्या.

दरम्यान, भारत आणि नेदरलँड्स यांच्यातील सामना हा देखील साखळी फेरीतील शेवटचा सामना आहे. यानंतर 15 आणि 16 नोव्हेंबरला दोन उपांत्य फेरीचे सामने होतील. टीम इंडिया मुंबईतील वानखेडे स्टेडियमवर न्यूझीलंड संघाविरुद्ध (15 नोव्हेंबर) सेमीफायनल खेळणार आहे. दुसरा उपांत्य सामना 16 नोव्हेंबर रोजी आॅस्ट्रेलिया विरूध्द दक्षिण आफ्रिका यांच्यात कोलकात्याच्या ईडन गार्डनवर होणार आहे. तर यंदाच्या विश्‍वकरंडक स्पर्धेचा अंतिम सामना 19 नोव्हेंबर रोजी अहमदाबादच्या नरेंद्र मोदी स्टेडियमवर खेळविला जाणार आहे.