नवी दिल्ली :– इंग्लंडवर मिळवलेला विजय आम्ही आमच्या देशाला व देशवासियांना समर्पीत करत आहोत, अशा शब्दात अफगाणिस्तानचा लेग स्पीन गोलंदाज रशीद खानने आपल्या भावना व्यक्‍त केल्या आहेत. अफगाणिस्तानमध्ये भूकंप झाला होता व त्यात शेकडो नागरिकांचा मृत्यू झाला तर अनेक जण गंभीर जखमी झाले आहेत. देशात जे काही सुरू आहे, त्यावर आम्ही शोक व्यक्‍त करत आहोत. परंतू इंग्लंडवर मिळवलेल्या विजयामुळे आमच्या नागरिकांच्या चेहऱ्यावर हास्य उमलले असेल अशी आशा करतो. या स्पर्धेत मला जे काही मानधन मिळेल ते सर्वच्या सर्व देशातील नागरिकांच्या सेवेसाठी अर्पण करणार आहे, असेही रशीद म्हणाला.

सामन्यानंतर राशिद म्हणाला, ‘हा आमच्यासाठी मोठा विजय आहे. अशा प्रकारची कामगिरी आम्हाला आत्मविश्वास देतो की ,आम्ही कोणत्याही दिवशी कोणत्याही संघाला पराभूत करू शकतो. प्रथम फलंदाजी करताना 284 धावा केल्यानंतर अफगाणिस्तानने इंग्लंडचा डाव 215 धावांत गुंडाळला. सामन्यानंतर राशिद खान म्हणाला की, या विजयामुळे विश्वचषकातील उर्वरित सामन्यांसाठी ऊर्जा मिळेल.

तो पुढे म्हणाला की, ‘क्रिकेट ही अफगाणिस्तानच्या लोकांना आनंद देणारी गोष्ट आहे. इंग्लंडविरुद्धचा सामना जिंकणे ही आमच्यासाठी मोठी गोष्ट आहे. अलीकडेच आमच्या देशात भूकंप झाला. 3,000 हून अधिक लोकांना आपला जीव गमवावा लागला. अनेक घरे उद्ध्वस्त झाली. त्यामुळे या विजयामुळे त्यांच्या चेहऱ्यावर हसू येईल आणि कदाचित ते वाईट दिवस ते थोड्या वेळासाठी का होईना विसरू शकतील.

अफगाणिस्तानला जोरदार भूकंपाचा धक्का बसला असून, हजारो लोकांचा मृत्यू झाला आहे आणि अनेक गावे उद्ध्वस्त झाली आहेत. खरं तर, रविवारी पश्चिम अफगाणिस्तानात 6.3रिश्टर स्केलचा शक्तिशाली भूकंप झाला. मुजीब उर रहमान, ज्याला त्याच्या अष्टपैलू कामगिरीसाठी सामनावीर म्हणून गौरवण्यात आले, त्यानेही आपला पुरस्कार आपल्या देशवासियांना समर्पित केला.  मुजीबने सामन्यात 51 धावांत तीन बळी घेतले आणि 16 चेंडूत 28 धावा केल्या.