बारामती : येथील नाट्य व सांस्कृतिक क्षेत्रात गेली ४५ वर्षे अविरत कार्यरत असलेली नटराज नाट्य कला मंडळाच्या वतीने यंदाही एक विशेष उपक्रम आयोजित करण्यात आला आहे. दिन ८, ९ व १० ऑगस्ट २०२५ या कालावधीत संस्थेच्यावतीने त्रिदिवसीय नाट्यमहोत्सवाचे आयोजन करण्यात आले असून, तीन दर्जेदार नाटके रसिक प्रेक्षकांसमोर सादर होणार आहेत.

नटराज नाट्य कला मंडळ गेली ४५ वर्षे बारामतीमध्ये विविध सांस्कृतिक कार्यक्रमांचे आयोजन करत असून, शहरातील रसिक प्रेक्षकांना दर्जेदार कलाविष्काराची मेजवानी देत आली आहे. संस्थेचा उद्देश बारामतीच्या सांस्कृतिक जडणघडणीत मोलाची भर घालणे हाच राहिलेला आहे. यंदाच्या नाट्यमहोत्सवात सामाजिक, ऐतिहासिक आणि भावस्पर्शी कथानकांवर आधारित नाटके निवडण्यात आली असून, प्रेक्षकांना वैविध्यपूर्ण अनुभव मिळणार आहे.

प्रवेश सर्वांसाठी विनामूल्य आहे, मात्र प्रवेशिका आवश्यक आहे.प्रवेशिका नसलेल्या प्रेक्षकांना प्रवेश दिला जाणार नाही. मर्यादित जागेमुळे प्रवेशिका लवकर मिळवाव्यात, असे आवाहन मंडळाच्यावतीने करण्यात आले आहे. प्रवेशिका संस्थेच्या सदस्यांकडे उपलब्ध आहेत.सर्व नाटके दररोज रात्री ९ वाजता नटराज नाट्यगृह, बारामती येथे सादर करण्यात येणार आहेत.

प्रयोगाचे तपशील पुढीलप्रमाणे:
▪️ ०८ ऑगस्ट (शुक्रवार) – “महादेव”
▪️ ०९ ऑगस्ट (शनिवार) – “कर्ण”
▪️ १० ऑगस्ट (रविवार) – “माधव”

“नटराज नाट्य कला मंडळाने गेल्या चार दशकांहून अधिक काळ बारामतीच्या रंगभूमीला सातत्याने समृद्ध केले आहे. यंदाचा नाट्यमहोत्सव ही देखील रसिकांसाठी एक संस्मरणीय सांस्कृतिक पर्वणी ठरणार आहे. सर्वांनी उपस्थित राहून कलाकारांचे मनोबल वाढवावे, हीच अपेक्षा.”

किरण गुजर प्रमुख नटराज नाट्यकला मंडळ