Chocolate Chip Cookies: चॉकलेट म्हटलं की लहानांपासून मोठ्यांपर्यंत अनेकांच्या चेहऱ्यावर आनंद येतो. चॉकलेटपासून बनवलेले केक, मिल्कशेक, ब्राउनी किंवा कुकीज अनेकांना आवडतात. त्यातही चॉकलेट चिप कुकीज हा एक असा पदार्थ आहे, जो चहासोबत किंवा संध्याकाळच्या स्नॅक्ससाठी अगदी परफेक्ट ठरतो. बाहेरून क्रिस्पी आणि आतून सॉफ्ट असलेल्या कुकीज घरीही अगदी सहज बनवता येतात.

परफेक्ट चॉकलेट चिप कुकीज बनवण्यासाठी काही गोष्टींचे प्रमाण योग्य असणे महत्त्वाचे आहे. मैदा, बटर, ब्राउन शुगर, साखर आणि चॉकलेट चिप्स यांचे योग्य प्रमाण कुकीजची चव आणि टेक्सचर ठरवते. कुकीज अधिक सॉफ्ट हव्या असतील तर ब्राउन शुगर आणि थोडे कॉर्नस्टार्च वापरले जाते.

चॉकलेट चिप कुकीजसाठी साहित्य  (Chocolate Chip Cookies)

मैदा – १½ कप म्हणजे साधारण १९० ग्रॅम
अनसाल्टेड बटर – ½ कप म्हणजे ११३ ग्रॅम
ब्राउन शुगर – ½ कप
पांढरी साखर – ¼ कप
अंडे – १
अंड्याची जर्दी – १
व्हॅनिला इसेन्स – १ छोटा चमचा
बेकिंग सोडा – ½ छोटा चमचा
कॉर्नस्टार्च – १ छोटा चमचा
मीठ – ¼ छोटा चमचा
चॉकलेट चिप्स – १ कप
वरून घालण्यासाठी अतिरिक्त चॉकलेट चिप्स

कुकीज बनवण्याची सोपी पद्धत

सर्वात आधी एका भांड्यात मैदा, बेकिंग सोडा, कॉर्नस्टार्च आणि मीठ घ्या. हे सर्व पदार्थ व्यवस्थित एकत्र करून बाजूला ठेवा. कॉर्नस्टार्चमुळे कुकीजला सॉफ्ट टेक्सचर मिळण्यास मदत होते. आता दुसऱ्या भांड्यात बटर वितळवून घ्या. मात्र बटर गरम असताना त्यात साखर घालू नका. वितळलेले बटर काही मिनिटे थंड होऊ द्या. त्यानंतर त्यात ब्राउन शुगर आणि पांढरी साखर घालून चांगले मिसळा.

यानंतर त्यात एक अंडे, अंड्याची जर्दी आणि व्हॅनिला इसेन्स घाला. हे मिश्रण एकसारखे होईपर्यंत फेटून घ्या. आता आधी तयार केलेले मैद्याचे मिश्रण हळूहळू यात घाला. मैदा पूर्णपणे मिसळेपर्यंतच मिश्रण करा. पीठ जास्त वेळ मिक्स करू नका. जास्त मिक्स केल्यास कुकीज कडक होऊ शकतात.

यानंतर त्यात चॉकलेट चिप्स घाला आणि हलक्या हाताने मिसळा. तयार झालेला डो झाकून कमीत कमी एक तास फ्रिजमध्ये ठेवा. वेळ असेल तर डो रात्रभर फ्रिजमध्ये ठेवू शकता. यामुळे कुकीजची चव अधिक चांगली येते आणि बेक करताना त्या जास्त पसरत नाहीत.

कुकीज बेक करण्याची पद्धत

ओव्हन १७५ अंश सेल्सिअसवर प्रीहीट करा. बेकिंग ट्रेवर पार्चमेंट पेपर किंवा बटर पेपर लावा. तयार डोचे समान आकाराचे गोळे करून ट्रेवर ठेवा. प्रत्येक गोळ्यामध्ये पुरेसे अंतर ठेवा, कारण बेक होताना कुकीज थोड्या पसरतात.

प्रत्येक कुकीच्या वर काही अतिरिक्त चॉकलेट चिप्स लावा. आता ट्रे ओव्हनमध्ये ठेवून साधारण १० ते १२ मिनिटे बेक करा. कुकीजच्या कडा हलक्या सोनेरी रंगाच्या झाल्या आणि मधला भाग थोडा सॉफ्ट दिसत असेल तर कुकीज ओव्हनमधून बाहेर काढा.

परफेक्ट कुकीजसाठी लक्षात ठेवा या गोष्टी

पिघळलेले बटर थोडे थंड करूनच वापरा. गरम बटर वापरल्यास चॉकलेट वितळण्याची शक्यता असते. मैदा मोजताना त्याचे प्रमाण जास्त होणार नाही याची काळजी घ्या. जास्त मैदा वापरल्यास कुकीज कोरड्या आणि जाड होऊ शकतात.

तसेच डो जास्त मिक्स करू नका. चॉकलेट चिप्स कमी न घालता योग्य प्रमाणात वापरा, म्हणजे प्रत्येक घासात चॉकलेटची चव मिळेल. सर्वात महत्त्वाचे म्हणजे कुकीज जास्त वेळ बेक करू नका. कडा सेट आणि हलक्या सोनेरी झाल्या, तर कुकीज बाहेर काढा. सुरुवातीला मधला भाग थोडा सॉफ्ट वाटला तरी थंड झाल्यावर कुकीज व्यवस्थित सेट होतात.

अशा प्रकारे अगदी सोप्या पद्धतीने तुम्ही घरीच बाहेरून क्रिस्पी आणि आतून सॉफ्ट, चॉकलेटने भरलेल्या स्वादिष्ट कुकीज तयार करू शकता.