पुणे –  कोंढव्यात सावत्र आई व बापाकडून मुलांचा साभांळ न करता त्यांचा छळ केल्याच्या आरोपावरून दोन गुन्हे दाखल करण्यात आले आहेत. एका सामाजिक संस्थेला हा प्रकार समजल्यानंतर त्यांनी खात्री करून कोंढवा पोलिसांकडे तक्रार दिली.

याबाबत ज्ञानदेवी चाईल्ड लाईन संस्थेच्या अपर्णा मकरंद मोडक (वय 46, रा. भारती विद्यापीठ) यांनी तक्रार दिली आहे. त्यानुसार सलीम शेख व मुलाची सावत्र आई शाहीन समील शेख (रा.कोंढवा खुर्द) यांच्यावर जुवेनाईल जस्टीस ऍक्टनुसार गुन्हा दाखल केला आहे.

आरोपी सलीम व शाहीन हे त्यांच्या आठ वर्षाच्या मुलीचा सांभाळ व्यवस्थित न करता तिला मारहाण करत होते. शाहीन ही मुलीची सावत्र आई आहे. ती मुलीस वेळेवर जेवन न देता शिवीगाळ करून त्रास देत होती. ही बाबत तक्रारदार यांच्या सामाजिक संस्थेला समजली. त्यानुसार खात्री करून त्यांनी पोलिसांकडे तक्रार दिली आहे.

दुसऱ्या घटनेत ज्ञानदेवी चाईल्ड संस्थेच्या सविता दिवटे (वय 48, रा. औंध) यांनी तक्रार दिली आहे. त्यानुसार मुलीचे सावत्र वडील आहिल खान (रा. कोंढवा) याच्यावर गुन्हा दाखल करण्यात आला आहे. खान हा त्याच्या 13 वर्षाच्या सावत्र मुलीचा व्यवस्थित सांभाळ करत नव्हता. तसेच, तिला किरकोळ कारणावरून पाठीत फळीने मारहाण करत होता.

गेल्या सहा महिन्यापासून सतत शिवीगाळ करून लाथा-बुक्क्यांनी मारहाण करत होता. तसेच, तिला जेवन ही व्यवस्थित देत नव्हता. याबाबत सामाजिक संस्थेने खात्री करून पोलिसांकडे धाव घेऊन तक्रार दिली आहे. त्यानुसार पोलिस अधिक तपास करत आहेत.