Pune Crime : सिंहगड रोड पोलिसांनी सराईत गुन्हेगारांविरुद्ध कारवाईचा बडगा उगारला आहे. गंभीर गुन्ह्यांमध्ये सहभागी असलेल्या राज रविंद्र जागडे (वय २४) याच्यावर महाराष्ट्र विघातक कृत्यांना प्रतिबंध करण्यासंबंधीच्या (एमपीडीए) कायद्यानुसार कारवाई करून त्याला नागपूर येथे एक वर्षासाठी स्थानबद्ध करण्यात आले आहे. तर सराईत आरोपी सोमनाथ भिमा चांदणे (वय २०) याला पुणे शहर, पिंपरी-चिंचवड पोलीस आयुक्तालय आणि पुणे जिल्ह्याच्या हद्दीतून एक वर्षासाठी तडीपार करण्यात आले आहे.

राज जागडेवर एमपीडीएअंतर्गत कारवाई –

राज रविंद्र जागडे हा सिंहगड रोड पोलीस ठाण्याच्या अभिलेखावरील सराईत गुन्हेगार आहे. त्याच्याविरुद्ध दुखापत करणे, नागरिकांमध्ये दहशत निर्माण करणे यांसारखे गंभीर गुन्हे दाखल आहेत. त्याच्या गुन्हेगारी कारवायांना आळा घालण्यासाठी पोलिसांनी एमपीडीए कायद्यानुसार कारवाई केली. त्यानुसार त्याला नागपूर येथे एक वर्षासाठी स्थानबद्ध करण्यात आले आहे.

सोमनाथ चांदणे एक वर्षासाठी तडीपार –

सोमनाथ भिमा चांदणे (वय २०, रा. रेणुकामाता मंदिराजवळ, वडगाव पठार, वडगाव बुद्रुक, पुणे) याच्याविरुद्धही सिंहगड रोड पोलीस ठाण्यात गंभीर स्वरूपाचे गुन्हे दाखल आहेत. त्यामध्ये दुखापत करणे, विनापरवाना अग्निशस्त्र बाळगणे आणि नागरिकांमध्ये दहशत निर्माण करणे यांसारख्या गुन्ह्यांचा समावेश आहे. त्याच्या गुन्हेगारी कारवायांवर नियंत्रण मिळविण्यासह सार्वजनिक कायदा व सुव्यवस्था अबाधित राखण्यासाठी पोलिसांनी त्याला तडीपार करण्याचा प्रस्ताव तयार केला होता.

पोलिसांनी महाराष्ट्र पोलीस कायद्याच्या कलम ५६ (१) (अ) व (ब) अन्वये हा प्रस्ताव पोलीस उपायुक्त, परिमंडळ तीन यांच्याकडे सादर केला. प्रस्तावाचे अवलोकन केल्यानंतर पोलीस उपायुक्तांनी तडीपारीचे आदेश दिले. आदेश क्रमांक १७/२०२६, दिनांक १३ ऑक्टोबर २०२६ नुसार सोमनाथ चांदणे याला पुणे शहर पोलीस आयुक्तालय, पिंपरी-चिंचवड पोलीस आयुक्तालय आणि पुणे जिल्ह्याच्या कार्यक्षेत्रातून एक वर्षासाठी तडीपार करण्यात आले आहे.

वरिष्ठांच्या मार्गदर्शनाखाली कारवाई –

ही कारवाई पोलीस उपायुक्त, परिमंडळ तीन, पुणे शहर येथील डॉ. सागर कवडे आणि सिंहगड रोड विभागाचे सहाय्यक पोलीस आयुक्त विजय कुंभार यांच्या सूचनांनुसार करण्यात आली. सिंहगड रोड पोलीस ठाण्याचे वरिष्ठ पोलीस निरीक्षक विनय पाटणकर आणि पोलीस निरीक्षक (गुन्हे) समीर गायकवाड यांच्या मार्गदर्शनाखाली सर्व्हेलन्स पथकाचे पोलीस उपनिरीक्षक भुपेश साळुंके, पोलीस हवालदार पंकज देशमुख, पोलीस अंमलदार अरविंद धावडे आणि महिला पोलीस शिपाई आश्विनी त्रिभुवन यांनी ही कारवाई केली.