* दुहेरी हत्याकांडाचा ७ दिवसांत छडा
* २२ वर्षीय विकास लडकतला अटक
* मृत महिलेचा चुलत नातू असल्याची माहिती
* आरोपीकडून गुन्ह्याची कबुली
* ऑनलाइन जुगारामुळे कर्जबाजारी झाल्याची माहिती
* सीसीटीव्ही नसतानाही पोलिसांनी लावला तपासाचा छडा

मोरगाव : बारामती तालुक्यातील जिरायती भागातील बाबुर्डी (शेरेवाडी) येथे दोन वृद्ध महिलांच्या खळबळजनक दुहेरी हत्याकांडाचा अवघ्या सात दिवसांत छडा लावण्यात सुपे पोलिसांना यश आले आहे. या प्रकरणात विकास लडकत (वय २२) याला पोलिसांनी अटक केली असून, त्याने गुन्ह्याची कबुली दिल्याची माहिती सूत्रांकडून मिळाली आहे. धक्कादायक बाब म्हणजे मृत महिलांपैकी एकीचा तो चुलत नातू असल्याचे समोर आले आहे.

दि. २९ सप्टेंबर रोजी इंदुमती मारुती लडकत (वय ६५) आणि कृष्णाबाई कुंडलिक लडकत (वय ५०) या दोन महिलांवर अज्ञात व्यक्तीने कोयत्याने वार करून त्यांचा खून केला होता. या घटनेमुळे संपूर्ण परिसरात भीतीचे वातावरण निर्माण झाले होते.

घटनेनंतर सुपे पोलिसांनी तपासाची चक्रे वेगाने फिरवत पाच तपास पथके तयार केली होती. परिसरात पुरेसे सीसीटीव्ही कॅमेरे नसल्याने तपासासमोर मोठे आव्हान निर्माण झाले होते. मात्र पोलिसांनी उपलब्ध माहिती, तांत्रिक तपास आणि गोपनीय सूत्रांच्या आधारे तपास पुढे नेत संशयितापर्यंत पोहोचण्यात यश मिळवले.

सूत्रांच्या माहितीनुसार, विकास लडकत हा ऑनलाइन जुगारामुळे कर्जबाजारी झाला असल्याची माहिती तपासात पुढे आली आहे. या आर्थिक अडचणींचा आणि दुहेरी हत्याकांडाचा नेमका संबंध काय, याचा तपास पोलीस करीत आहेत.

गोपनीय माहितीच्या आधारे पोलीस शिपाई किसन ताडगे, महादेव साळुंखे, भाऊसाहेब चौधरी आणि पीयूष माळी यांच्या पथकाने संशयिताचा माग काढत त्याला ताब्यात घेतले. चौकशीत त्याने गुन्ह्याची कबुली दिल्याचे सूत्रांनी सांगितले.

पोलिसांच्या तपासाला यश
सीसीटीव्हीची कमतरता, परिसरातील भीतीचे वातावरण आणि घटनेचे गांभीर्य असतानाही पोलिसांनी अवघ्या सात दिवसांत तपास पूर्णत्वास नेल्याने या प्रकरणातील महत्त्वाचे धागेदोरे हाती आले आहेत. आरोपीला न्यायालयात हजर केल्यानंतर पुढील तपासात हत्येचे नेमके कारण, गुन्ह्यातील अन्य सहभाग आणि हत्येसाठी वापरलेल्या शस्त्राबाबत अधिक माहिती समोर येण्याची शक्यता आहे.

GST council : GST मध्ये मोठा बदल? करचुकवेगिरीप्रकरणी अटकेचा अधिकार होणार रद्द ; ७ ऑक्टोबरला निर्णय