Kolhapur : शाहाळ्याच्या नारळांचा कल्पक पुनर्वापर; तुळशी विवाहानिमित्त १०० रोपांचे मोफत वाटप
Kolhapur : विशेष म्हणजे, रोपे तयार करण्यासाठी प्लास्टिकच्या पिशव्या किंवा प्लास्टिकच्या कुंड्यांचा वापर करण्यात आला नाही.

कोल्हापूर : पर्यावरण संवर्धन आणि प्लास्टिकचा वापर कमी करण्याच्या उद्देशाने जनकल्याण सामाजिक सेवा संस्था युवा आघाडी कोल्हापूरच्या वतीने तुळशी विवाहाच्या मंगलमय पर्वानिमित्त १०० तुळशीच्या रोपांचे मोफत वाटप करण्यात आले. मिरजकर तिकटी येथे हा उपक्रम आयोजित करण्यात आला होता.
या उपक्रमांतर्गत पाणी पिऊन झाल्यानंतर टाकून दिल्या जाणाऱ्या शाहाळ्याच्या नारळांचा पुनर्वापर करून त्यामध्ये माती भरून तुळशीची रोपे तयार करण्यात आली होती. विशेष म्हणजे, रोपे तयार करण्यासाठी प्लास्टिकच्या पिशव्या किंवा प्लास्टिकच्या कुंड्यांचा वापर करण्यात आला नाही.
टाकाऊ वस्तूंचा पुनर्वापर करून पर्यावरणपूरक उपक्रम राबविता येतात, याची जाणीव नागरिकांना करून देणे, प्लास्टिकचा वापर कमी करण्यास प्रोत्साहन देणे आणि पर्यावरण संवर्धनाचा संदेश समाजापर्यंत पोहोचविणे हा या उपक्रमामागील उद्देश होता.
यावेळी जनकल्याण सामाजिक सेवा संस्था युवा आघाडीचे अध्यक्ष ओंकार पाटील, उदयसिंह पाटील, तन्वी गंगाई, ऋषी सुतार, श्वेता नरतवडेकर, सायली बिरंजे, सार्थक सासणे आदी उपस्थित होते.





