lpg price hike : केंद्र सरकारने घरगुती आणि व्यावसायिक एलपीजी सिलिंडरच्या दरात मोठी दरवाढ केल्याने सर्वसामान्यांच्या खिशाला कात्री लागली आहे. या निर्णयाचा भारतीय कम्युनिस्ट पक्ष (मार्क्सवादी) तीव्र निषेध केला असून, ही दरवाढ तातडीने मागे घेण्याची मागणी केली आहे. केंद्र सरकारचे धोरण हे पूर्णपणे जनविरोधी असल्याचे ताशेरे ओढत माकपने ही वाढ मध्यमवर्गीय आणि गरीब कुटुंबांवर लादलेला मोठा आर्थिक बोजा असल्याचे म्हटले आहे. माकपच्या पॉलिटब्युरोने प्रसिद्ध केलेल्या पत्रकात म्हटले आहे की, एकीकडे लोकांचे उत्पन्न घटत असताना दुसरीकडे जीवनावश्यक वस्तूंचे भाव गगनाला भिडत आहेत. अशा परिस्थितीत करांमध्ये सवलत देऊन जनतेला दिलासा देण्याऐवजी सरकार स्वतःचा महसूल वाढवण्याला प्राधान्य देत आहे. आंतरराष्ट्रीय बाजारपेठेतील कच्च्या तेलाच्या किमती आणि पश्चिम आशियातील तणावाचे कारण देऊन सरकार आपली जबाबदारी झटकत आहे, ही बाब अत्यंत दुर्दैवी आणि दांभिकपणाची असल्याचे माकपने नमूद केले. या दरवाढीमागे अमेरिकेच्या दबावाचे आणि जागतिक धोरणांचे प्रतिबिंब दिसत असल्याची टीकाही पक्षाने केली आहे. ट्रम्प प्रशासनाच्या युद्धखोर धोरणांपुढे शरणागती पत्करून सरकार देशातील जनतेच्या हिताकडे दुर्लक्ष करत असल्याचा आरोप माकपने केला आहे.
