Jaan Kumar Sanu: देशात पुन्हा एकदा कोविड-19 च्या रुग्णसंख्येत वाढ होत असल्याने नागरिकांमध्ये चिंता वाढू लागली आहे. काही राज्यांमध्ये नव्याने रुग्ण आढळत असून, चार वर्षांनंतर कोविडमुळे मृत्यूची नोंद झाल्याने आरोग्य यंत्रणाही सतर्क झाली आहे. त्यातच ‘बिग बॉस 14’चा स्पर्धक आणि गायक जान कुमार सानू याला कोरोनाची लागण झाल्याची माहिती समोर आली आहे. त्याला उपचारासाठी रुग्णालयात दाखल करण्यात आले असून, यानंतर पुन्हा एकदा कोरोना आणि मास्कबाबत चर्चा सुरू झाली आहे.

जान कुमार सानू यांनी रुग्णालयातील बेडवरून एक व्हिडीओ सोशल मीडियावर शेअर केला. त्यासोबत त्यांनी विनोदी शैलीत, “चायना से आया मेरा दोस्त, कोविड को सलाम करो,” असे कॅप्शन दिले. त्यांच्या या पोस्टनंतर चाहत्यांनी त्यांच्या प्रकृतीबाबत चिंता व्यक्त करत लवकर बरे होण्यासाठी शुभेच्छा दिल्या.

देशातील काही भागांमध्ये अलीकडेच कोरोना रुग्ण आढळल्यामुळे लोकांच्या मनात पुन्हा एकदा जुने प्रश्न निर्माण झाले आहेत. पुन्हा मास्क बंधनकारक होणार का? सोशल डिस्टन्सिंगचे नियम लागू होतील का? लॉकडाऊनसारखी परिस्थिती निर्माण होईल का? मात्र, आरोग्य तज्ज्ञांचे म्हणणे आहे की सध्या अशा प्रकारची भीती बाळगण्याचे कारण नाही.

 

View this post on Instagram

 

तज्ज्ञांच्या मते, कोविड-19 पसरवणारा सार्स-कोव्ह-2 (SARS-CoV-2) हा विषाणू पूर्णपणे संपलेला नाही. तो वेळोवेळी स्वतःमध्ये बदल करत नवीन व्हेरियंटच्या स्वरूपात समोर येत असतो. हंगामी फ्लूसारखाच हा विषाणूही सतत बदलत राहतो. त्यामुळे काही काळाने रुग्णसंख्येत वाढ होऊ शकते. मात्र, सध्या आढळणारे बहुतांश रुग्ण सौम्य लक्षणांचे असून गंभीर आजाराचे प्रमाण कमी आहे.

दरम्यान, आंध्र प्रदेशमध्ये जवळपास चार वर्षांनंतर कोविड-19 मुळे एका व्यक्तीचा मृत्यू झाल्याची नोंद झाली आहे. कडप्पा जिल्ह्यातील 46 वर्षीय व्यक्तीचा उपचारादरम्यान मृत्यू झाला. त्याशिवाय आणखी चार जण कोरोना पॉझिटिव्ह आढळले आहेत. या प्रकरणांनंतर राज्यातील आरोग्य विभाग सतर्क झाला असून परिस्थितीवर बारकाईने लक्ष ठेवले जात आहे.

विशेष म्हणजे, संक्रमित झालेल्या सर्वांनी कोविड लसीचे किमान दोन डोस घेतले होते. त्यापैकी एका व्यक्तीने बूस्टर डोसही घेतला होता. यामुळे लस घेतल्यानंतरही संसर्ग होऊ शकतो, हे स्पष्ट झाले आहे. मात्र, तज्ज्ञांच्या मते लसीमुळे गंभीर आजार आणि मृत्यूचा धोका मोठ्या प्रमाणात कमी होतो.

संक्रमित चार जणांपैकी तिघांवर घरीच उपचार सुरू आहेत, तर एका व्यक्तीला सौम्य लक्षणांमुळे रुग्णालयात दाखल करण्यात आले आहे. त्यामुळे सध्या बहुतेक रुग्णांमध्ये गंभीर लक्षणे दिसून येत नसल्याचे चित्र आहे.

मग पुन्हा मास्क घालणे बंधनकारक होणार का? यावर डॉक्टरांचे म्हणणे आहे की सध्या तरी सरकारकडून सर्वांसाठी मास्क सक्ती करण्याचा कोणताही निर्णय झालेला नाही. मात्र, सध्या व्हायरल संसर्गाचा हंगाम असल्याने गर्दीच्या ठिकाणी, रुग्णालयात किंवा बंद जागांमध्ये मास्कचा वापर करणे फायदेशीर ठरू शकते. यामुळे केवळ कोरोना नव्हे, तर इतर श्वसनविकारांपासूनही संरक्षण मिळू शकते.

आरोग्य तज्ज्ञ नागरिकांना घाबरून न जाता सतर्क राहण्याचा सल्ला देत आहेत. ताप, खोकला, घसा दुखणे किंवा श्वास घेण्यास त्रास अशी लक्षणे आढळल्यास त्वरित डॉक्टरांचा सल्ला घ्यावा. तसेच हातांची स्वच्छता, आवश्यक ठिकाणी मास्कचा वापर आणि वैयक्तिक स्वच्छतेची काळजी घेतल्यास संसर्गाचा धोका कमी करता येऊ शकतो.