Shah Rukh Khan : मराठी चित्रपटसृष्टीतील लोकप्रिय अभिनेता श्रेयस तळपदे यांनी आपल्या दमदार अभिनयाच्या जोरावर मराठीसोबतच हिंदी चित्रपटसृष्टीतही वेगळी ओळख निर्माण केली आहे. छोट्या पडद्यापासून मोठ्या पडद्यापर्यंतचा यशस्वी प्रवास करणाऱ्या श्रेयसने अनेक गाजलेल्या हिंदी चित्रपटांमध्ये महत्त्वाच्या भूमिका साकारल्या आहेत.

याशिवाय त्याने निर्मिती क्षेत्रातही पाऊल टाकले असून त्याचा आगामी मराठी चित्रपट ‘मर्दिनी’ लवकरच प्रेक्षकांच्या भेटीला येणार आहे. तसेच, पुष्पा: द राइज आणि पुष्पा 2: द रूल या चित्रपटांच्या हिंदी आवृत्तीत मुख्य पात्राला आवाज देण्याचे कामही श्रेयसने केले आहे.   (Shah Rukh Khan)

 

दरम्यान, नुकताच प्रसिद्ध दिग्दर्शिका, निर्माती आणि कोरिओग्राफर फराह खान यांनी त्यांच्या कुकिंग व्लॉगसाठी श्रेयस तळपदे यांच्या घरी भेट दिली. या व्लॉगमध्ये गप्पांच्या ओघात श्रेयसने आपल्या आयुष्यातील एक भावूक प्रसंग सांगितला. मुंबईत स्वतःचं पहिलं घर खरेदी करताना त्याला आलेल्या अडचणी आणि त्या वेळी शाहरुख खान व फराह खान यांनी केलेल्या मदतीचा किस्सा त्याने उलगडला.   (Shah Rukh Khan)

‘ओम शांती ओम’मुळे शक्य झालं पहिलं घर :  (Shah Rukh Khan)

गप्पा मारताना श्रेयस म्हणाला, “आमचं पहिलं घर कोणामुळे झालं माहिती आहे का? ते ‘ओम शांती ओम’मुळे.” हे ऐकताच फराह खान आश्चर्यचकित झाली आणि म्हणाली, “अरे, मी त्या घरी आले होते. ते घर खूपच सुंदर होतं.”

यानंतर श्रेयसने त्या काळातील संघर्ष सांगितला. तो म्हणाला, “मी होम लोनसाठी बँकेत गेलो होतो. मात्र, त्या वेळी मी कर्जासाठी पात्र नव्हतो. बँकेतील अधिकाऱ्यांनी विचारलं की, तू आणखी कोणत्या चित्रपटात काम करतोयस? तेव्हा मी ‘ओम शांती ओम’चं नाव सांगितलं.”

श्रेयस पुढे म्हणाला, “बँकेतील अधिकाऱ्यांनी विचारलं की, या चित्रपटात कोण आहे? मी सांगितलं, शाहरुख खान. त्यानंतर त्यांनी विचारलं, दिग्दर्शक कोण आहेत? मी फराह खान असं सांगितलं. मग त्यांनी विचारलं की, त्यांच्याकडून एक अधिकृत पत्र मिळू शकेल का?”

“मी लगेच फराह खानला फोन केला. अवघ्या दोन दिवसांत तिने शाहरुख खानकडून पत्र मिळवून दिलं. ते पत्र बँकेत दिल्यानंतर त्याच संध्याकाळी माझं होम लोन मंजूर झालं,” असा भावूक खुलासा श्रेयसने केला.

हे ऐकल्यानंतर फराह खान हसत म्हणाली, “मला खूप आनंद झाला. म्हणजे ‘ओम शांती ओम’साठी आम्ही तुला चांगलेच पैसे दिले असणार.”

‘ओम शांती ओम’ ठरला कारकिर्दीतील महत्त्वाचा टप्पा :  (Shah Rukh Khan)

ओम शांती ओम हा चित्रपट फराह खान यांच्या दिग्दर्शनाखाली तयार झाला होता. रेड चिलीज एंटरटेनमेंटच्या बॅनरखाली निर्मित या चित्रपटात शाहरुख खान यांनी दुहेरी भूमिका साकारली होती, तर दीपिका पदुकोण यांनी याच चित्रपटातून बॉलिवूडमध्ये पदार्पण केले.

2007 मध्ये प्रदर्शित झालेला हा चित्रपट त्या वर्षातील सर्वाधिक यशस्वी चित्रपटांपैकी एक ठरला. त्यातील गाणी, संवाद आणि कलाकारांच्या अभिनयाला प्रेक्षकांनी भरभरून प्रतिसाद दिला.

या आठवणींमधून श्रेयस तळपदे यांनी एक महत्त्वाची गोष्ट अधोरेखित केली यशाच्या प्रवासात योग्य वेळी मिळालेली साथ आयुष्य बदलू शकते. शाहरुख खान आणि फराह खान यांनी केलेल्या छोट्याशा मदतीमुळे त्याचं स्वतःचं घर घेण्याचं स्वप्न पूर्ण झालं, अशी भावना त्याने या व्लॉगमध्ये व्यक्त केली.