नवी दिल्ली – देशात करोनाची दुसरी लाट ओसरत असल्याचे चित्र आहे. एका वेळी चार लाखांपर्यंत आढळून येणारी रुग्णसंख्या ही आता 30 ते 40 हजारांवर आली आहे.

दुसरी लाट ओसरल्यानंतर अनेक राज्यांमध्ये अनलॉक करण्यास सुरुवात झाली आहे. मात्र पूर्णपणे निर्बंध उठवले गेले नसले तरी अनेक ठिकाणी मोठ्या प्रमाणात सूट देण्यात आली आहे. मात्र केंद्राने पॉझिटिव्ही रेट जास्त असलेल्या जिल्ह्यांत कडक पावले उचलण्याचे आदेश दिले आहेत.

केंद्रीय गृहमंत्रालयाने कोविड-19 मार्गदर्शक तत्वे 31 ऑगस्टपर्यंत लागू करण्याच्या सूचना दिली आहे. तसेच राज्यांना पॉझिटिव्ह रुग्णाचे प्रमाण जास्त असणाऱ्या जिल्ह्यांमध्ये कठोर उपाययोजना करण्यास सांगितले आहे.

यासंदर्भात केंद्रीय गृहसचिव अजय भल्ला यांनी सर्व राज्ये आणि केंद्रशासित प्रदेशांना पत्र पाठविले आहे. कोविड -19 प्रकरणांमध्ये घट होत असली तरी करोनाच्या प्रोटोकॉलचे नियमांचे पालन करणे गरजेचे असल्याचे त्यात नमूद करण्यात आले आहे.