Delhi Fire: साखर झोपेतच घाला…अंथरुणातच तीन मृतदेह…उरली फक्त हाडं, ओळख पटवणंही कठीण ; भीषण अग्निकांडाने दिल्ली हादरली

Delhi Fire: राजधानी दिल्लीतील विवेक विहार याठिकाणी चार मजली इमारतीला भीषण आग लागली. आतापर्यंत नऊ जणांचा मृत्यू झाला असून, अनेक जण जखमी झाले आहेत. आग इतकी भीषण होती की, आत झोपलेल्यांना बाहेर पडण्याची संधीही मिळाली नाही.

काही जण त्यांच्या पलंगावर मृतावस्थेत आढळले, तर काही जण जिन्यावर जळून खाक झाले होते. शोधकार्य सुरू असल्याने मृतांचा आकडा वाढण्याची भीती अधिकाऱ्यांनी व्यक्त केली आहे.

अग्निशमन कर्मचाऱ्याने दिलेल्या माहितीनुसार, पहाटे 3:47च्या सुमारास अग्निशमन नियंत्रण कक्षाला (फायर कंट्रोल रूम) फोन आला. चौदा अग्निशमन गाड्या घटनास्थळी दाखल झाल्या आणि आग नियंत्रणात आणण्यासाठी व आत अडकलेल्यांना बाहेर काढण्यासाठी बचावकार्य सुरू केले.

बचाव पथकांनी दाट धुराच्या लोटातून 12 हून अधिक लोकांना बाहेर काढले. मृतांचा आकडा आठवरून नऊ झाला असून, चार जण गंभीररित्या भाजले आहेत. जखमींना जवळच्या रुग्णालयात दाखल करण्यात आले आहे.

VIDEO | Fire broke out across six flats in Delhi’s Vivek Vihar. Casualties feared. Fire tenders on the spot. Further details awaited.

Source: Third Party

(Full video available on PTI Videos- https://t.co/dv5TRAShcC) pic.twitter.com/3sLYFzSD6n

— Press Trust of India (@PTI_News) May 3, 2026

बेडवरच तीन मृतदेह आढळले Delhi Fire:
पोलिसांनी सांगितले की, अपघातात मृत्यूमुखी झालेल्यांची ओळख अद्याप पटलेली नाही, कारण सापडलेले मृतदेह अत्यंत वाईट अवस्थेत आहेत. दरम्यान, अग्निशमन दलाच्या म्हणण्यानुसार, तीन जणांचे मृतदेह त्यांच्या अंथरुणात आढळले.

प्राथमिक तपासानुसार, एसीच्या स्फोटामुळे आग लागल्याचे संकेत मिळत आहेत. इमारतीच्या नेमक्या कोणत्या मजल्यावर किंवा भागात आग लागली, याचा तपास सुरू आहे. आग नियंत्रणात आणण्यात आली आहे, परंतु कुलिंगचे काम अजूनही सुरू आहे.

फ्लॅटमध्ये एसीच्या स्फोटामुळे आग लागली Delhi Fire:
मिळालेल्या माहितीनुसार, इमारतीच्या दुसऱ्या मजल्यावरील एका फ्लॅटमध्ये एसीच्या स्फोटामुळे आग लागली आणि ती तिसऱ्या मजल्यापर्यंत पसरली. मिळालेल्या माहितीनुसार, आगीच्या ज्वाला तिसऱ्या मजल्यावर पोहोचल्यानंतर फ्लॅटमधील रहिवासी स्वतःला वाचवण्यासाठी छतावर धावले,

परंतु छताचा दरवाजा बंद असल्याने त्यांचा मृत्यू झाला. दुसऱ्या मजल्यावरही चार जण उपस्थित होते, त्यांचाही मृत्यू झाला.